लेटाङः मोरङको लेटाङ नगरपालिकाले टोलवासीसँग जनप्रतिनिधि कार्यक्रम अन्तर्गत टोलटोलमा पुगेर नगरवासीका गुनासा सुन्न थालेको छ । बुधबार साँझ लेटाङ– १ राजारानी टोलका स्थानीयवासीसँग नगरप्रमुख भुपेन्द्रकुमार लावती, उपप्रमुख उपप्रमुख कृष्णकुमारी निरौला र वडाध्यक्ष विष्णुकुमार मगर लगायतको टोलीले गुनासा सुनेको हो ।
लेटाङ–१ स्थित राजारानी टोल विकास संस्थाअन्तर्गत पर्ने तल्लो राजारानी र गैरीटोलका टोलवासीसँग अन्तरक्रिया भएको हो । टोलवासी दिनभर विभिन्न कृषि कर्म तथा ज्याला मजदुरीमा व्यस्त हुने भएकाले उनीहरुको फुर्सदको समय पारेर साँझमा नगर प्रमुख सहितको जनप्रतिनिधिको टोली बस्तीमा पुगेको थियो ।
स्थानीयवासीले सिँचाइ, पशु उपचार, केराखेतीमा देखिएको समस्या, खानेपानी र विपन्नको घर निर्माण लगायतका समस्या टोलमा रहेको सुनाएका थिए ।
जवाफमा नगरप्रमुख लावतीले टोलवासीको समस्या समाधानका लागि नगरपालिकाले आवश्यक काम गर्ने प्रतिबद्धता जनाउनुभएको छ । उहाँले छलफलका क्रममा नगरपालिकामार्फत प्रदान गरिने नगर अस्पतालको सेवा, पुश अस्पतालको सेवा, युवायुवातीहरुलाई सीपमुलक तालिमको व्यवस्था लगायतका बारेमा पनि जानकारी गराउनुभएको थियो ।
वडासदस्य गीता मगरको घरमा भएको छलफल कार्यक्रमको अध्यक्षता राजारानी टोल विकास संस्थाका अध्यक्ष सुजन मगरले गर्नुभएको थियो । नगरपालिकाले गतवर्षदेखि शुरु गरेको टोल–टोलमा पुगेर जनताको समस्या सुन्ने कार्यक्रमअन्तर्गत यस वर्ष पनि सो कार्यक्रमलाई निरन्तरता दिएको हो ।
