विराटचोकः हालै स्थापना भएर साहित्यिक गतिविधिमा क्रियाशील कोसी साहित्य–कला परिषद् नेपालले नयाँ कार्यको थालनी गर्ने भएको छ । जसअनुसार सिर्जनशीलतालाई विकसित गर्दै साहित्यलाई गाउँ गाउँसम्म पुर्याउने उद्देश्यले ‘किसानसँग सिर्जना संवाद’ कार्यक्रम सञ्चालन गरिने भएको हो ।
परिषद्का अध्यक्ष केशु विरहीका अनुसार कृषक र कृषिकर्मसँग मात्र सम्बन्धित रचनाको वाचन तथा विमर्शसहितको कार्यक्रम गर्न लागिएको हो । गाउँगाउँमा पठन संस्कृतिको विकासका लागि आफूहरूले यस प्रकारको कार्यक्रम शुरु गरेको संस्थाका अध्यक्ष केशु विरही बताउनुहुन्छ । साहित्यका पाठक बजारमा भन्दा गाउँमा बढी छन् भन्ने धारणाअनुसार साहित्यलाई गाउँ गाउँसम्म पुर्याउन अभियान थालिएको उहाँको भनाइ छ ।
सिर्जनशीलताको विकास गर्दै हरेक समुदायमा साहित्यका पाठक बढाउन गरिएको पहिलो प्रयास सफल भएमा निरन्तरता दिने र अन्य समुदाय लक्षित कार्यक्रम पनि सञ्चालन गर्ने विरही बताउनुहुन्छ । गुणात्मक कार्यक्रम मात्र गर्ने योजना बनाएको परिषद्ले पुस ४ गते शुक्रबार मोरङको रङ्गेली नगरपालिका –१, बबियाविर्ता, मोरङमा कृषिकर्मसँग संलग्न रहेका रचना मात्र वाचन गर्ने कार्यक्रम राखेको हो
परिषद्का सचिव नवराज पोखरेल ‘नवशिला’ का अनुसार सो दिन कृषि र साहित्यबीचको अन्तरसम्बन्ध विषयमा र वाचन गरिएका रचनामाथि समीक्षकहरूको टिप्पणीसमेत रहने भएको छ ।
कार्यक्रमको सहआयोजक संस्था रङ्गेली साहित्य कला समाजका सचिव चिरञ्जीवी काफ्लेका अनुसार कृषिकर्म तथा कृषकसँग सम्बन्धित कार्यक्रम भएकाले गाउँघर सुहाउँदो बनाउने प्रयास गरिएको छ । जसअनुसार कार्यक्रमस्थलमा कुर्सी नराखी भुइँमै बसेर कार्यक्रम गर्ने र किसानले नै बनाएको खाजा प्रयोग गरिने भएको छ ।
मङ्सिर १३ गते बेलबारी बहुमुखी क्याम्पसमा एक औपचारिक कार्यक्रम गरेर संस्थाले पहिलो पटक सार्वजनिक कार्यक्रम गर्दै साहित्यकार पुण्यप्रसाद सुवेदीको जीवनी, व्यक्तित्व र कृतित्वमाथि विमर्श गरेको थियो ।
