गोठगाउँः मोरङको सुन्दरहरैंचा–७ गोठगाउँमा रहेको सृजना सामुदायिक वन उपभोक्ता समूहको १५ आँै साधारणसभा आइतबार सम्पन्न भएको छ ।
साधारणसभालाई प्रमुख अतिथिको आसनबाट सम्बोधन गर्नुहुँदै सुन्दरहरैंचा नगरपालिकाको वडा नम्बर ७ का वडाध्यक्ष भुवनसिंह मगरले वन जोगाउन सबै उपभोक्ता सचेत हुनुपर्ने बताउनुभयो । १ हजार परिवार रहेको समूहबाट वनको रेखदेख तथा वृक्षरोपणलगायतका काम गर्न १० प्रतिशत पनि उपस्थित नहुनु दुःखद भएको बताउनुभयो ।
सब डिभिजन वन कार्यालय सलकपुरका प्रमुख गोपाल दाहालले आफ्नो कार्यालय मातहतमा रहेका ७ वटा सामुदायिक वन उपभोक्ता समूहमध्ये हरेक क्षेत्रमा पुछारमा रहेको सृजना सामुदायिक वन उपभोक्ता समूहलाई अघि बढाउन कार्यसमिति तथा उपभोक्ता सबै लाग्नुपर्नेमा जोड दिनुभयो ।
साधारणसभालाई सो वन उपभोक्ता समूहका पूर्व अध्यक्ष भक्तिप्रसाद सिटौलाले पनि सम्बोधन गर्नुभएको थियो ।
समूहका अध्यक्ष लेखनाथ प्रसाईँले समूहको वार्षिक प्रगति प्रतिवेदन प्रस्तुत गर्नुभएको थियो । लेखा समितिका संंयोजक डण्डबहादुर खड्काले लेखा समितिको प्रतिवेदन प्रस्तुत गर्नुभएको थियो ।
रमेश आचार्यले सञ्चालन गर्नुभएको कार्यक्रममा उपाध्यक्ष तारा अधिकारीले स्वागत मन्तव्य व्यक्त गर्नुभएको थियो ।
साधारणसभामा छिमेकी सामुदायिक वन उपभोक्ता समूहका प्रतिनिधि, जनप्रतिनिधि, संघसंस्थाका प्रतिनिधि तथा उपभोक्ताको उपस्थिति रहेको थियो ।
