सुन्दरहरैंचाः नेपाली शेयर बजार सन् २०२३ भर घट्दो क्रममा रह्यो । वर्षको उत्तराद्र्धमा भने बजारले फड्को मार्न खोज्यो । नीतिगत सुधार, वित्तीय प्रणालीमा सहज तरलता अनि ब्याजदर घट्न थालेकाले वर्षान्तको अन्त्यतिर आइपुग्दा बजारले उकालो यात्रा तय गर्न लागेको अनुमान गरिएको छ ।
सन् २०२२ को अन्तिम दिन नेप्से परिसूचक २०२९.०३ बिन्दुमा रोकिएको थियो । सन् २०२३ को अन्तिम कारोबारको दिन (डिसेम्बर २८) मा नेप्से परिसूचक २०६८.९० विन्दुमा आएर अडिएको छ । यसले २०२३ अन्तिमतिर आउँदा सामान्य अंकले माथि गएको देखिन्छ ।
नेपाल राष्ट्र बैंकले चालु आर्थिक वर्षको मौद्रिक नीति र प्रथम त्रैमासिक समीक्षामार्फत् शेयर बजारमा केही लचिलो नीति लिएको छ । शेयर बजारमा ५० लाखभन्दा बढीको कर्जाको जोखिमभार घटाएर १२५ प्रतिशतमा झारिएको छ । यसअघि यस्तो कर्जामा १५० प्रतिशत जोखिमभार थियो । ब्याजदर घटाएर अर्थतन्त्र चलायमान बनाउने नीति पनि केन्द्रीय बैंकले यसै वर्ष लिएको छ । फलस्वरुपः कर्जाको ब्याजदर घट्दै गएको छ । यसले आगामी दिनमा शेयर बजार बढ्न टेवा पुग्ने अनुमान छ ।
लगतार बढेको बजारको गतिमा अहिले ब्रेक लागेको छ । त्यो करेक्सनमात्रै हो वा बजारले घट्दो लय समातेको हो भन्ने हेर्न केही समय पर्खनुपर्ने देखिन्छ ।
