काठमाडौंः नेपाल राष्ट्र बैंकले १०० दरका नयाँ नोट आजदेखि चलनचल्तीमा ल्याएको छ ।
बैंकका अनुसार साबिककै आकार र रङमा सङ्केत नम्बर क २००००००१ देखि घ ४०९९९९९९ सम्म नेपाल सरकारको जमानत प्राप्त यसको रुपैयाँ भुक्तानी माग्न आएमा नेपाल राष्ट्र बैंकबाट रुपैयाँ १०० (रुपैयाँ एक सय) तुरुन्त पाइनेछ भन्ने प्रतिज्ञामूलक वाक्यांशसहित निम्न विशेषता भएको नोट चलनचल्तीमा आएको छ ।
नयाँ नोटको अग्र र पृष्ठ भागमा निम्न विवरणहरु हुने बताइएको छः
नोटको अग्रभागमा
१. नोटको बायाँतर्फ सगरमाथाको चित्र रहेको ।
२. नोटको दायाँतर्फ लालीगुराँसको पानीछाप रहेको ।
३. नोटको मध्यभागमा नेपालको नक्सा रहेको ।
४. नोटको मध्यभागमा अशोक स्तम्भको चित्रका साथै LUMBINI THE BIRTH PLACE OF LORD BUDDHA लेखिएको । साथै, अशोक स्तम्भसँगै दृष्टिविहीनहरूलाई नोट पहिचानको लागि छामेर थाहा पाउने एउटा कालो थोप्ला रहेको र बायाँतर्फ अण्डाकारभित्र Silver Metallic मा मायादेवीको चित्र रहेको ।
५. २ मि.मि. चौडा भएको रङ परिवर्तन हुने (नोटलाई सिधा हेर्दा रातो रङ र ढल्काएर हेर्दा हरियो रङ देखिने) सुरक्षण धागो रहेको ।
६. नोटमा गभर्नरको दस्तखत रहने स्थानमा तत्कालीन गभर्नर महाप्रसाद अधिकारीको दस्तखत रहेको ।
७. नोटको तल्लो भागको बोर्डरमा नोटको Series Number नेपालीमा ’वि.सं. २०८१’ लेखिएको ।
नोटको पृष्ठभागमा
१. नोटको मध्यभागको माथिल्लो खण्डमा अङ्ग्रेजीमा NEPAL RASTRA BANK लेखिएको ।
२. नोटको मध्यभागमा एकसिङे गैंडाको माउ र बच्चाको चित्र रहेको ।
३. नोटको तल्लो भागको बोर्डरमा अङ्ग्रेजीमा RUPEES ONE HUNDRED लेखिएको ।
४. नोटको तल्लो भागको बोर्डरमा नोटको Series Number अङ्ग्रेजीमा 2024 A.D. लेखिएको ।
केन्द्रीय बैंकले यसअघि २०७६ असोज ७ गतेदेखि रुपैयाँ १०० दर (सेरिज २०१९) को बैंक नोट सङ्केत नम्बर ओ १८ ०००००१ देखि क ३७ ९९९९९९ सम्म चलनचल्तीमा ल्याइने भनी सूचना प्रकाशित गरिएकोमा सङ्केत नम्बर ओ १८ ०००००१ देखि क १९ ०३४५०० सम्म मात्र चलनचल्तीमा ल्याइएको समेत प्रष्ट पारेको छ ।
