गछियाः यही मंसिर १५ गतेदेखि २२ गतेसम्म गछिया युवा समाज मोरङको आयोजनामा अन्तर्राष्ट्रिय आमन्त्रण प्रथम गछिया गोल्डकप–२०८२ हुने भएको छ ।
प्रतियोगिताबारे जानकारी दिन बिहीबार आयोजकले गछियामा पत्रकार सम्मेलन गरेको थियो । प्रतियोगितामा नेपाल र भारतका गरी ८ टिम सहभागी हुनेछन् । प्रतियोगिताको विजेता टिमले नगद २ लाख १ हजार र उपविजेता टिमले नगद १ लाख १ हजार रुपैयाँ पाउनेछन् ।
अयोजक गछिया फुटबल क्लबका अध्यक्ष सरोज दाहालका अनुसार मंसिर १५ गते उद्घाटन खेल सहलेश फुटबल क्लब र बेलबारी फुटबल क्लबबीच हुनेछ । १६ गते आयोजक गछिया युवा क्लब र लिजेण्ड फुटबल एकेडेमी पश्चिम बंगाल, दार्जिलिङबीच हुनेछ । १७ गते जलथल फुटबल क्लब र गाईघाट युनाइटेड क्लबबीच खेल हुनेछ १८ गते राष्ट्रिय जागृति फुटबल क्लब र दमक फुटबल क्लबबीच खेल हुनेछ । १९ गते पहिलो सेमीफाइनल, २० गते दोस्रो सेमीफाइनल र २२ गते फाइनल खेल हुने आयोजकले जनाएको छ ।
खेल संयोजक प्रह्लाद थोप्रा लिम्बूका अनुसार प्रतियोगितामा व्यक्तिगत विधामा उत्कृष्ट प्रदर्शन गर्ने खेलाडी तथा प्रशिक्षकलाई विशेष नगद पुरस्कार प्रदान गरिनेछ । प्रतियोगितामा म्यान अफ द सिरिजले २५ हजार रुपैयाँ प्राप्त गर्नेछ । उत्कृष्ट डिफेन्स, फरवार्ड, मिडफिल्डर, गोलकिपर तथा उत्कृष्ट कोचले जनही ११–११ हजार रुपैयाँ पुरस्कार पाउनेछन् । प्रत्येक खेलमा ‘म्यान अफ द म्याच’ लाई पाँच हजार एक सय रुपैयाँ प्रदान गरिने भएको छ ।
प्रतियोगिताको क्रममा सुन्दरहरैंचाका हरेक वडाका १ जना ज्येष्ठ नागरिकलाई सम्मान गरिने भएको छ । अपाङ्गता भएका १ जना पुरुष र १ जना महिलालाई ह्वील चेयर पनि वितरण गरिने भएको छ ।
पत्रकार सम्मेलनमा सुन्दरहरैँचा खेलकुद विकास समितिका सदस्य–सचिव खड्ग श्रेष्ठको प्रमुख आतिथ्यता रहेको थियो ।
लागूऔषधमुक्त समाज निर्माण गरी युवालाई खेलकुदतर्फ आकर्षित गर्ने उद्देश्यसहित प्रतियोगिता आयोजना गर्न लागिएको आयोजकले जनाएको छ ।
