काठमाडौंः लुम्बिनी लायन्सले आफ्नो पहिलो खेलमा चितवन राइनोजलाई ६ विकेटले हराउंदै सिद्धार्थ बैक नेपाल प्रिमियर लिग (एनपीएल) को दोस्रो संस्करणमा विजयी शुरुवात गरेको छ । लुम्बिनी पहिलो संस्करणमा एक खेल मात्र जितेर खेलको अन्तिममा रहेको थियो ।
चालु संस्करणमा पहिलो खेलमा कर्णाली याक्सलाई हराउँदै विजयी शुरुवात गरेको चितवन राइनोज लुम्बिनीसँग पराजित भएको हो । लुम्बिनीले पहिलो संस्करणमा चितवन राइनोजलाई मात्रै हराएको थियो । यसपटक पनि पहिलो खेलमा त्यही दोहोरिएको छ ।
चितवनले दिएको १४३ रनको लक्ष्य लुम्बिनीले १८.३ ओभरमा ४ विकेट गुमाएर १४६ रन बनाएको हो । लुम्बिनीका लागि गुल्बादिन नइबले अविजित रहँदै २३ बलमा सर्वाधिक ४४ रन बनाए । कप्तान रोहित पौडेलले ४४ बलमा ३९ रन बनाए ।
लुम्बिनीको लागि ओपर सन्दीप जोराले २८ रन, डार्शी सटले ११ रन बनाए ।बलिङमा चितवनका रिजन ढकालले २ विकेट लिए ।
त्यसअघि रबि बोपाराले लगातार दोस्रो खेलमा अर्धशतक प्रहार गरेपछि चितवन राइनोजले नेपाल लुम्बिनी लायन्सलाई १४३ रनको लक्ष्य दिएको थियो ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको चितवनले निर्धारित २० ओभरमा ७ विकेट गुमाएर १४२ रन बनाएको हो ।
बोपाराले ५५ बलमा सर्वाधिक ६६ रन बनाए । यस्तै कप्तान कुशल मल्लले २१ रन, सैफ जैबले १५, देव खनालले १५ र दीपक बोहरा १० रन बनाए ।
बलिङमा लुम्बिनीका नामिबियन खेलाडी रुबेन ट्रम्पलम्यानले ३ विकेट, अभिशेष गौतमले २ र गुल्बादिन नइबले २ विकेट लिए ।
रुबेन ट्रम्पलमनले ४ ओभरमा २३ रन दिएर ३ विकेट लिएर प्लेयर अफ द म्याच बनेका थिए ।
