काठमाडौंः गत संस्करणको उपविजेता टोली सुदूरपश्चिम रोयल्सले काठमान्डु गोर्खाजलाई हराएर सिद्धार्थ बैंक नेपाल प्रिमियर लिग (एनपीएल) क्रिकेट प्रतियोगितामा विजयी शुरुवात गरेको छ ।
सुदूर पश्चिमको तर्फबाट खेलेका अमेरिकी खेलाडी हर्मीत सिंहको अलराउन्ड प्रदर्शनमा सुदूरपश्चिमले राजधानीको टोलीलाई हारको बाटो देखाएको हो ।
पहिलो खेलमा साविक विजेता जनकपुर बोल्ट्सलाई हराएको काठमान्डु गोर्खाज सुदूर पश्चिमसँग पराजित भएको हो ।
खेलमा टस हारेर पहिले ब्याटिङको निम्तो पाएको सुदूरपश्चिमको सुरुवात खराब भएको थियो । सुदूरले पहिलो ओभरमै २ ब्याटरको विकेट गुमाएको थियो । करण केसीको बलमा जोश ब्राउन एलबीडब्लुमा परे भने विनोद भण्डारी क्याचआउट भए ।
सुदूरले २० ओभरमा १४७ रन बनाएर डिफेन्ड गर्न सकिने माहोल बनाएको थियो । जवाफमा काठमाडौंले १६.५ ओभरमै सबै विकेट गुमाउँदै ११८ रन मात्रै जोड्न सक्यो ।
सुदूरपश्चिम रोयल्सले काठमान्डु गोर्खाजलाई ३० रनले पराजित गर्दै शानदार जीत हात पारेको छ ।
