विराटचोकः नझरेका फूलहरूले भदौ महिनाका प्रत्येक शनिबार ‘स्रष्टासँग शनिबार’ कार्यक्रम प्रस्तुत गर्ने क्रममा भोलि शनिबार डा. अस्मिता बिष्टलाई प्रस्तुत गर्ने भएको छ । महेन्द्र बहुमुखी क्याम्पस धरानमा शिक्षण गर्नुुहुने डा. बिष्टसँगको साहित्यिक कार्यक्रम भोलि बिहान साढे सात बजे हुने भएको छ ।
कार्यक्रममा डा. बिष्टले आफ्ना केही कविता वाचन गर्नुहुनेछ । प्रस्तोता केपी घिमिरेका अनुसार भोलिको कार्यक्रम डा. दीपक न्यौपानेको सभापतित्व र कोशी प्रदेशका सांसद मानबहादुर लिम्बूको प्रमुख आतिथ्यतामा हुन लागेको हो ।
शृङ्खलाको पहिलो कार्यक्रममा गत शनिबार इनरुवाका गजलकार राज भट्टराईले आफ्ना गजल सुनाउनुभएको थियो ।
भदौ महिनाका सबै कार्यक्रम सुन्दरहरैंचा – १० खोर्सानेमा रहेको सृजना रेष्ट्रो एण्ड क्याफेमा हुने भएका छन् ।
