विराटचोकः साताको अन्तिम कारोबार दिन बिहीबार नेप्से परिसूचक ३८ दशमलव १० अङ्क घटेर २७८१ दशमलव ०० विन्दुमा झरेको छ ।
नेप्से घटे पनि कारोबार रकम भने बढेको छ । बुधबार ७ अर्ब ६८ करोड रुपैयाँको शेयर किनबेच भएकोमा बिहीबार ३२२ कम्पनीको ७८ हजार ३७९ पटकको कारोबारमा १ करोड ७८ लाख ९१ हजार ९१७ कित्ता शेयर किनबेच हुँदा ८ अर्ब ९ करोड ५६ लाख १० हजार ४४५ रुपैयाँको शेयर किनबेच भएको छ ।
बजार घटे पनि विकास हाइड्रोपावरको शेयर लगातार सातौँ दिन पनि १० प्रतिशतले बढेको छ । ओरियन्टल होटलको शेयरमूल्य सर्वाधिक ४ दशमलव ७१ प्रतिशत घटेको छ ।
कारोबार रकमका आधारमा बिहीबार नेपाल पुनर्बीमा कम्पनी शीर्ष स्थानमा रहँदै ६५ करोड ४४ लाख ३ हजार ८२२ रुपैयाँको शेयर किनबेच भएको छ । हिमालयन रि इन्स्योरेन्स, हिमालयन डिष्टिलरी, शिवम् सिमेण्ट र युनाइटेड मोदी हाइड्रोपावर उच्च कारोबार गर्ने कम्पनीमा परेका छन् ।
बिहीबार २ उपसमूहको परिसूचक बढेको छ भने ११ उपसमूहको परिसूचक घटेको छ । विकास बैंक उपसमूहको परिसूचक सर्वाधिक २ दशमलव ३८ प्रतिशत घटेको छ । सामुहिक लगानी कोष र निर्जीवन बीमा उपसमूहको परिसूचक सामान्य बढेको छ ।
बजार घटेसँगै समग्र बजार पूँजीकरण ४६ खर्ब ४७ अर्ब १८ करोड ५१ लाख ९९ हजार ५०८ रुपैयाँ निर्धारण भएको छ ।
