इटहरीः नेपालबिट मिडिया प्रालिले सञ्चालन गरेको ‘क्याफेमा कविता’ को तेस्रो शृङ्खलामा उदयपुरका कवि हिमालय पौडेलले आफ्ना ८ वटा कविता सुनाउनुभएको छ । उहाँले सबै कविता छन्दमा सुनाउनुभएको थियो ।
इटहरीमा रहेको माइतीघर क्याफेमा शनिबार भएको कार्यक्रममा कवि पौडेलका छन्द कविता सुन्न इटहरीका साथै बेलबारी, सुन्दरहरैंचा, विराटनगर तथा इटहरीका २५ जना साहित्यानुरागीको उपस्थिति थियो ।
कवि टीका आत्रेयको अध्यक्षतामा भएको कार्यक्रमको प्रमुख अतिथि शिक्षासेवी लेखनाथ घिमिरे रहनुभएको थियो । कार्यक्रमको सञ्चालन नेपालबिट मिडियाका सञ्चालक रामप्रसाद खरेलले गर्नुभएको थियो ।
हरेक शनिबार ‘क्याफेमा कविता’ अन्तर्गत इटहरीको माइतीघर क्याफेमा कार्यक्रम सञ्चालन भइरहेको छ । निरन्तर ९ सातासम्म क्याफेमा कविता कार्यक्रम आयोजना गरी दशौं शृङ्खलामा बृहत् कार्यक्रम सञ्चालन गरिने आयोजक संस्थाले जनाएको छ ।
