विराटचोकः जागृत युवा समाजले २५ औँ अन्तर्राष्ट्रिय युवा दिवसको अवसर पारेर शुक्रबार आयोजना गरेको वक्तृत्वकला प्रतियोगितामा साजीलाल माविकी विद्यार्थी रोजिना कार्की पहिलो हुनुभएको छ ।
‘जलवायु परिवर्तनले नेपालमा पारेको प्रभाव’ शीर्षकमा भएको वक्तृत्व प्रतियोगितामा ज्योति माविकी मनिका मगरले दोस्रो, साजीलाल माविकी आकृति अधिकारीले तेस्रो स्थान प्राप्त गर्नुभएको छ । जनता मावि त्रिजुगाकी आकृति आचार्यले सान्त्वना स्थान प्राप्त गर्नुभएको छ ।
सुन्दरहरैंचाका ४ वटा सामुदायिक विद्यालयका ९ जना विद्यार्थी सहभागी भएको प्रतियोगिताको निर्णायकमा सुकुना बहुमुखी क्याम्पसका प्राध्यापक डा. दीपकप्रसाद न्यौपाने र शिशिर एकेडेमीका प्रिन्सिपल सन्तोष घिमिरे हुनुहुन्थ्यो ।
सुन्दरहरैंचा नगरपालिका वडा नम्बर ९ को सभाहलमा समाजकी अध्यक्ष सुमित्रा विश्वकर्माको अध्यक्षतामा भएको प्रतियोगिता सुन्दरहरैंचा नगरपालिकाका नगरप्रमुख केदारप्रसाद गुरागाईँको प्रमुख आतिथ्यतामा भएको थियो ।
आवासका लागि सहयोग समूह (लुमन्ती) को सहयोगमा भएको कार्यक्रमको सञ्चालन समाजका उपाध्यक्ष अजय ऋषिदेवले गर्नुभएको थियो । कार्यक्रमको औचित्यको बारेमा सञ्जित चौधरीले प्रष्ट पार्नुभएको थियो ।
