सुन्दरहरैंचाः मंसिर २७ गतेदेखि सर्वसाधारणका लागि निष्काशन तथा बिक्री खुला गरेको आईपीओमा आवेदन दिने समय हिमालयन रि इन्स्योरेन्स लिमिटेडले थप गरेको छ ।
आवश्यक संख्यामा आवेदन प्राप्त भएपश्चात सो सम्बन्धी सार्वजनिक सूचना प्रकाशन गरी निष्काशन बन्द गरिने कम्पनीले जनाएको छ । कम्पनीले १० अर्ब रुपैयाँ जारी पूँजीको ३० प्रतिशतले हुन आउने तीन अर्ब रुपैयाँ बराबरको तीन करोड कित्ता शेयर बिक्रीमा राखेको छ ।
कम्पनीले प्रतिशेयर अंकित १०० रुपैयाँमा १०६ रुपैयाँ प्रिमियम थप गरी प्रति कित्ता २०६ रुपैयाँका दरले हुन आउने ६ अर्ब १८ करोड रुपैयाँको शेयर निष्काशनमा ल्याएको हो । त्यसमध्ये २ प्रतिशत अर्थात ६ लाख कित्ता कम्पनीमा कार्यरत कर्मचारीलाई सुरक्षित गरिएको छ भने वैदेशिक रोजगारीमा रहेका नेपालीहरुका लागि ३ करोड कित्ता शेयर निष्काशन गरि बाँडफाँड भएको छ । सामुहिक लगानी कोषका लागि १५ लाख कित्ता शेयर बाँडफाँड भइसकेको छ ।
बाँकी रहेको २ करोड ४९ लाख कित्ता शेयर सर्वसाधारणका लागि निष्काशनमा ल्याइएको थियो । छिटोमा आज बिक्री बन्द हुने दिन भए पनि पर्याप्त आवेदन नपरेकाले पुस ११ गतेसम्म समय थपिएको कम्पनीले जनाएको छ । पर्याप्त आवेदन परेपछि जुनसुकै दिन पनि सो आईपीओ निस्कासन बन्द हुनेछ ।
