विराटचोकः आज जम्मा १० मिनेट पनि शेयर कारोबार भएन । २ पटक सर्किट ब्रेक लगाउँदा पनि बजार लगातार बढेर ६ प्रतिशतले वृद्धि भएपछि लामो समय कारोबार हुन नपाएको हो ।
११ बजेर ५ मिनेट जाँदा बजार ४ प्रतिशतले बढेपछि २० मिनेटलाई लागेको सर्किट ब्रेक हटेपछि ११ बजेर २५ मिनेट जाँदा सुचारु भएको कारोबार २ मिनेटपछि फेरि बन्द भएको थियो ।
थप १ प्रतिशत बढेर ५ प्रतिशतको वृद्धि भएपछि ११ बजेर २७ मिनेट जाँदा ४० मिनेटको लागि रोकिएको कारोबार १२ बजेर ७ मिनेट जाँदा खुलेको थियो । तर त्यसको २ मिनेटमै फेरि १ प्रतिशत बढेर जम्मा ६ प्रतिशतले बजार बढेपछि आजको लागि कारोबार नै बन्द भएको थियो ।
२०७८ मंसिर ३० गते पनि बजार ६ प्रतिशतले बढेर नियमित कारोबारभन्दा अघि नै बन्द भएको थियो । सो दिन बजार १३७ अंकले बढेर २४१८.८५ विन्दुमा अडिएको थियो । त्यसपछि बजार ६ प्रतिशतले बढ्ने या घट्ने गरेको थिएन ।
शुक्रबार भएको मौद्रिक नीति समीक्षाले बैंक दर र नीतिगत दर घटाएपछि शेयर लगानीकर्ता उत्साहित भएका हुन् ।
