विराटचोकः सञ्चालनमा रहेका २० वाणिज्य बैंकहरुमध्ये ९ वाणिज्य बैंकहरुले असोज महिनाका लागि ब्याजदर घटाएका छन् भने ९ वटाको स्थिर रहेको छ । बाँकी २ वाणिज्य बैंकहरुले असोज महिनाका लागि ब्याजदर बढाएका छन् ।
एनएमबि बैंक, कुमारी बैंक, प्राइम कमर्सियल बैंक, सानिमा बैंक, नेपाल एसबिआई बैंक, नबिल बैंक, एनआईसी एशिया बैंक, एभरेष्ट बैंक र राष्ट्रिय वाणिज्य बैंकले व्यक्तिगत मुद्दति निक्षेपमा अधिकतम ब्याजदर घटाएका छन् ।
कृषि विकास बैंक र नेपाल बैंकले ब्याजदर बढाएका छन् । बाँकी ९ बैंकहरुले भने भदौ महिनाकै ब्याजदरलाई निरन्तरता दिएका छन् ।
बैंकहरुको औसत ब्याजदर पनि घटेको छ । भदौ महिनामा ६ दशमलव ५२ प्रतिशतविन्दु रहेको बैंकहरुको व्यक्तिगत मुद्दति निक्षेपको ब्याजदर, असोजमा ० दशमलव १३ प्रतिशतविन्दु घटेर ६ दशमलव ३९८ प्रतिशत विन्दुमा झरेको छ ।
