विराटचोकः उतारचढावका बीच आज ५० दशमलव ७३ अर्थात् १ दशमलव ८८ अंक घटेर शेयर बजार मापक परिसूचक नेप्से २६३७ दशमलव ७९ बिन्दुमा अडिएको छ । सेन्सेटिभ इण्डेक्स ७.८१ अंक घटेको छ भने फ्लोट इण्डेक्स ३.४३ अंक र सेन्सेटिभ फ्लोट इण्डेक्स २.८३ अंक घटेको छ ।
नेप्से घटे पनि अघिल्लो कारोबारभन्दा आज २ करोडभन्दा बढीले कारोबार रकम बढेको छ । आज ३२४ कम्पनीको १ लाख १९ हजार ७३९ पटकको कारोबारमा १० अर्ब ३३ करोड ९२ लाख ३५ हजार ९५७ रुपैयाँको २ करोड ४८ लाख ४६ हजार ७८२ कित्ता शेयर किनबेच भएको छ ।
बजार घटे पनि रिभर फल्स पावर, हिमालयन हाइड्रोपावर, रावा इनर्जी र इष्टर्न हाइड्रोपावरको शेयरमूल्य १० प्रतिशतले बढेको छ । उता, थ्री स्टार हाइड्रोपावरको शेयरमूल्य भने १० प्रतिशतले घट्दा सिइडीबी हाइड्रो र ग्रीन लाइफ हाइड्रोको शेयरमूल्य पनि धेरै घटेको छ ।
कारोबार रकमका आधारमा आज सिईडिबि हाइड्रोपावर डेभलपमेन्ट कम्पनी शीर्ष स्थानमा रहेको छ । सो कम्पनीको ६४ करोड ३८ लाख ६६ हजार ७८० रुपैयाँको शेयर किनबेच भएको छ । सिइडीबी हाइड्रोले लाभांश घोषणा गर्नुका साथै १० प्रतिशतले शेयरमूल्य घटेपछि उच्च कारोबार भएको छ ।
सबै उपसमूहको परिसूचक घट्दा होटल तथा पर्यटन उपसमूहको परिसूचक सर्वाधिक ३ दशमलव ६३ प्रतिशत घटेको छ । त्यस्तै, यस दिन वित्त उपसमूहको परिसूचक साढे ३ प्रतिशत घटेको छ भने विकास बैंक, लगानी, जीवन बीमा, निर्जीवन बीमा र अन्य उपसमूहको परिसूचक २ प्रतिशतभन्दा बढी घटेको छ ।
बजार घटेसँगै समग्र बजार पूँजीकरण ४१ ख्र्ब ९४ अर्ब ३० करोड ८६ लाख २७ हजार ११० रुपैयाँमा सीमित भएको छ ।
