विराटनगरः एशियाकै दोस्रो ठूलो रथयात्रा दाबी गरिएको विराटनगरमा आज निकालिने श्रीकृष्णको रथयात्रामा आउने भक्तजनको सुरक्षा र सुविधाका लागि जिल्ला प्रहरी कार्यालयले सूचना जारी गरेको छ ।
यस्तो छ कार्यालयको अनुरोधः
१) बहुमुल्य गरगहनाहरू लगाई समारोहमा नआउनु हुन ।
२) अधिक नगद र बहुमुल्य सामग्रीहरू साथमा नल्याउनु हुन ।
३) रथयात्राको मार्ग (राधाकृष्ण मन्दिर–तिनपैनी चोक–ट्राफिक चोक–रोडशेष चोक बसपार्क महेन्द्र चोक–भृकुटी चोक–बरगाछी चोक–दुर्गा चोक हुँदै राधाकृष्ण मन्दिर) र समारोहस्थल वरपर सवारी साधन पार्किङ नगरीदिनुहुन ।
४) सवारी साधनहरूमा ह्यान्डल लक, ह्विल लक लगायतका सुरक्षाका अतिरिक्त विधिहरु समेत अपनाई सिसी टिभी तथा मानिसको निगरानी रहेको सुरक्षित स्थानमा मात्र पार्किङ गरी दिनुहुन ।
५) आफ्नो साथमा बालबालिकाहरू लिई समारोहमा नआउनु हुन ।
६) वृद्धवृृद्धाहरूले साथमा सहयोगी लिएर मात्र आउनु हुन ।
७) भीडभाडको फाइदा लिई महिला तथा बालबालिकाहरू माथि हुन सक्ने दुर्व्यवहारप्रति सजग रहनु हुन ।
८) घरका सवै सदस्यहरु एकैपटक घरबाट ननिस्की आलोपालो गरेर मात्र आउनुहुन ।
९) घरबाट सबै सदस्यहरु एकै समयमा बाहिर जानुपर्दा बलियोसँग ढोका बन्द गरेर मात्र जानुहुन ।
१०) तपाईको छेउमा रहेको जुनसुकै व्यक्ति शंकास्पद व्यक्ति हुन सक्ने भएकोले हर हमेसा चनाखो रहनु हुन ।
११) कुनै पनि प्रकारको चोरी, लुटपाट, दुर्व्यवहार लगायतका समस्या भएमा वा कसैको गतिविधि शंकास्पद लागेमा तत्काल नजिकैको प्रहरी वा प्रहरी कन्ट्रोलको १०० नम्बरमा जानकारी दिनुहुन ।
