लेटाङः प्रथम लेटाङ नगर महिला भलिबल कपको उपाधि वडा नं ७ ले जितेको छ । वडा नम्बर ९ लाई ३–२ को प्रतिस्पर्धात्मक सेटमा पराजित गर्दै वडा नम्बर ७ ले उपाधि जितेको हो । वडा नं ७ ले वडा नं ९ लाई २५–१८, २२–२५, २५–१८, २५–२७ र १५–० को सेटमा हराएको हो ।
लेटाङ भलिबल कोर्टमा मंगलबार सम्पन्न फाइनल खेलको विजेता वडा नं ७ ले उपाधि सहित नगद ६८ हजार तथा उपविजेता वडा नं ९ ले ट्रफीसहित नगद ३५ हजार पाएको छ ।
तेस्रो स्थानको लागि भएको खेलमा वडा नं ३ लाई ३–१ को सेटमा पराजित गर्दै वडा नम्बर ४ ले तेस्रो स्थान हासिल गरेको छ । वडा नम्बर ४ ले नगद २० हजार प्राप्त गरेको छ । यस्तै अनुशासित टिम घोषित भएको वडा नम्बर ३ ले नगद ६ हजार प्राप्त गरेको छ ।
वडा नं ३ की याविन्सा राईले उत्कृष्ट डिफेन्स, वडा नं ७ की ललिता मगरले उत्कृष्ट लिफ्टर तथा वडा नं ९ की स्मृति राईले उत्कृष्ट स्पाइकर घोषित हुँदै नगद पुरस्कार पाए । विजेता तथा उपविजेता टिम र उत्कृष्ट हुने खेलाडीलाई लेटाङ नगरपालिकाकी उपप्रमुख कृष्णकुमारी निरौला, प्रमुख प्रशासकीय अधिकृत नारायण न्यौपाने लगायतले पुरस्कार वितरण गर्नुभएको थियो ।
