धरानः २००५ सालदेखि औपचारिक विद्यालयको रूपमा सञ्चालन हुन थालेको धरानको शारदा बालिका नमूना विद्यालयले जेठ २४ गतेदेखि हीरक महोत्वस मनाउने भएको छ ।
महोत्सवबारे जानकारी दिन आयोजित पत्रकार सम्मेलनमा महोत्सवका संयोजक पदमप्रसाद लुइँटेलले महोत्सव १ साता चल्ने बताउनुभयो । विद्यालय व्यवस्थापन समिति अध्यक्ष दिभा श्रेष्ठले आफू व्यवस्थापन समितिमा आएपछि स्कुललाई नयाँ गति दिने योजना अघि बढाएको बताउनुभयो ।
उहाँका अनुसार विद्यालयमा आकर्षण बढाउन प्राविधिक विषयको पठनपाठन थप गर्ने योजनामा काम भइरहेको छ । फेसन डिजाइन तथा ब्युटी पार्लरको प्राविधिक विषय पठनपाठनको योजना रहेको अध्यक्ष श्रेष्ठले बताउनुभयो ।
प्रधानाध्यापक धर्मनारायण सिंहले विद्यालयको पुरानो साख फर्काउन हीरक महोत्सवले योगदान पुर्याउने विश्वास व्यक्त गर्नुभयो । महोत्सवमा विद्यालयका पूर्व विद्यार्थी, शिक्षक तथा स्थापनाकालमा योगदान गरेका दाताहरूलाई सम्मान गर्ने कार्यक्रम छ ।
महोत्सवमा विद्यार्थीका लागि स्वास्थ्य, साहित्य र खेलकुदका कार्यक्रमहरू राखिएका छन् । अभिभावकहरूमा क्यान्सर सचेतना, पाठेघरको मुख क्यान्सर परीक्षण, अभिभावक शिक्षा कार्यक्रम आयोजना गरिने बताइएको छ । आँखा परीक्षण, रक्तदान, हाडजोर्नी परीक्षणका शिविरहरू महोत्सवभर सञ्चालन गरिने भएको छ । नगरस्तरीय छात्रा भलिबल प्रतियोगिता, कविता प्रतियोगिता, नगरस्तरीय हाजिरीजवाफ प्रतियोगिता पनि सञ्चालन गरिने बताइएको छ ।
हीरक महोत्सवका लागि विद्यालयले १०१ जनाको मूल समारोह समिति गठन गरेको छ ।
बालिकाहरूलाई मात्र पढाउने भनी २००४ सालमा शुरु गरिएको शारदा बालिका नमूना विद्यालय कोशी प्रदेशकै पहिलो विद्यालय हो ।
