गछियाः साजीलाल माध्यमिक विद्यालयमा २०३९ सालको एसएलसी परीक्षामा ९६ जना विद्यार्थी सामेल भएका थिए । तीमध्ये ७४ जनाले एसएलसी उत्तीर्ण गरेका थिए । सोही ब्याचका केही विद्यार्थी बुधबार आफ्ना गुरु पीताम्बर दाहाललाई भेट्न गुरुको निवास सुन्दरहरैंचा ७ गछियमा पुगेका थिए ।
गुरुलाई भेट्न पुग्ने पूर्व विद्यार्थीमा जीवनयापनको क्रममा सुन्दरहरैंचा, इटहरी, विराटनगर र काठमाडौंमा बसोबास गर्नेहरु थिए । उनीहरुले गुरुलाई दोसल्ला ओढाएर सम्मान गर्नुका साथै फलफूल प्रदान गरेर गुरुबाट आशीर्वाद लिएका थिए ।
विद्यार्थी कालका गतिविधि स्मरण गर्नुका साथै हालको दैनिकीको बारेमा गुरुशिष्यबीच भलाकुसारी हुनुका साथै निजी जीवनका प्रसङ्ग सुनाउने अवसरका रुपमा सो भेटघाट महत्वपूर्ण रहेको भेटघाटमा सहभागी पूर्व विद्यार्थी कृष्णकुमारी श्रेष्ठले बताउनुभयो ।
आफ्ना विद्यार्थीसँग बोल्दा मात्रै पनि गुरुलाई सकारात्मक ऊर्जा मिल्ने हुनाले यस्ता भेटघाट महत्वपूर्ण हुने शिक्षक दाहालले बताउनुभयो ।
