विराटचोकः रिडी पावर कम्पनी लिमिटेडले फागुन १८ गतेदेखि हाल कायम चुक्ता पूँजीको ५० प्रतिशत हकप्रद शेयर बिक्री खुला गरेको छ । सो हकप्रद खरीदका लागि चैत ८ गतेसम्म आवेदन दिन पाइने कम्पनीले जनाएको छ ।
कम्पनीले ७७ करोड ४४ लाख ५० हजार ६०० रुपैयाँ बराबरको प्रतिशेयर १०० रुपैयाँ अंकित मूल्यका ७७ लाख ४४ हजार ५०६ कित्ता हकप्रद शेयर निष्काशन गरेको हो । हकप्रद शेयर निष्काशन प्रयोजनार्थ कम्पनीले माघ २२ गते बुक क्लोज गरेको हुनाले माघ २१ गतेसम्म कायम शेयरधनीले सो हकप्रद खरीदका लागि आवेदन दिन सक्नेछन् ।
शेयर निष्काशन तथा बिक्री प्रबन्धक मुक्तिनाथ क्यापिटल लिमिटेडका अनुसार लगानीकर्ताले बिक्री प्रबन्धकका साथै कम्पनीको केन्द्रीय कार्यालय, मुक्तिनाथ विकास बैंक र ग्लोबल आइएमई बैंकका तोकिएका शाखा कार्यालयहरुबाट आवेदन दिन सक्नेछन् । नेपाल धितोपत्र बोर्डबाट अनुमति लिई आस्वा सेवामा सहभागी बैंक तथा वित्तीय संस्थाहरुबाट सि आस्वा प्रणालीमार्फत र सिडिएस एण्ड क्लियरिङ्गबाट निर्माण गरिएको सफ्टवेयर मेरो शेयर अनलाइन प्रयोग गरी आवेदन दिन सकिने बताइएको छ ।
कम्पनीले हकप्रद शेयर निष्काशन गरी प्राप्त पूँजीको प्रयोग तल्लो बलेफी जलविद्युत आयोजनाको आवश्यक स्वपूँजीको रुपमा लगानी गर्ने भएको छ ।
