विराटचोकः नेपाली कांग्रेसको १५ औँ महाधिवेशनअन्तर्गत मोरङको सुन्दरहरैंचा नगरपालिकामा हिजो मतदान प्रक्रियामार्फत् नेतृत्व चयन भएको छ ।
५१३ जना क्षेत्रीय प्रतिनिधि (मतदाता) मध्ये ४९० जनाले मतदान गर्दा पोखरेलले २९२ मत पाउनुभयो । प्रतिष्पर्धी हरिबहादुर पौडेलले १८७ मत प्राप्त गर्नुभएको थियो ।
को हुन् होमनाथ पोखरेल
सामान्य परिवारबाट राजनीतिक यात्रा शुरु गरेका पोखरेल विद्यार्थी जीवनदेखि नै कांग्रेसको राजनीतिमा सक्रिय रहँदै आउनुभएको थियो । विद्यार्थी जीवनमै सरकारका गतिविधिविरुद्ध खरो रूपमा प्रस्तुत हुने तथा प्रभावशाली भाषण गर्ने युवाका रूपमा उहाँ परिचित हुनुहुन्थ्यो ।
विभिन्न संघसंस्थामा नेतृत्वदायी भूमिका निर्वाह गरेका पोखरेलले नगर सभापतिमा निर्वाचित भएपछि सुन्दरहरैंचा कांग्रेसलाई थप बलियो र व्यवस्थित बनाउने बताउनुभएको छ ।
सुन्दरहरैंचा–१ मा रहेको जनता माध्यमिक विद्यालयबाट पोखरेलले नेविसंघ जनता मावि पचाम इकाइ सभापतिबाट राजनीतिक यात्रा शुरु गर्नुभएको थियो । त्यसपछि सुकुना बहुमुखी क्याम्पस इकाइ सदस्य, सहसचिव, स्ववियु सदस्यका उम्मेद्वार तथा इकाइ सचिवको जिम्मेवारी सम्हाल्नुभएको थियो ।
मोरङ जिल्लाको तत्कालीन क्षेत्र नं. ८ को नेविसंघ सभापतिको जिम्मेवारी पनि सम्हाल्नुभएका पोखरेल हाल नेपाली कांग्रेस सुन्दरहरैंचाको सचिव पदमा रहेर पार्टीका गतिविधिमा संलग्न हुनुहुन्थ्यो । नगरसचिवपछि नगर सभापतिको बागडोर पोखरेलको हातमा आएको हो ।
सभापति पदमा विजयी भएपछि संक्षिप्त प्रतिक्रिया दिनुहुँदै पोखरेलले नगर संगठनलाई थप सुदृढ बनाउँदै नेता–कार्यकर्ताबीच एकता, मेलमिलाप, सहकार्य र समन्वयलाई प्राथमिकता दिने बताउनुभएको छ ।
कांग्रेसको राजनीतिक इतिहास र संगठनबारे राम्रो जानकारी राख्ने पोखरेल अब सुन्दरहरैंचा कांग्रेसको नगर संगठन हाँक्ने जिम्मेवारीमा पुग्नुभएको हो ।
यी हुन् निर्वाचित हुने अन्य पदाधिकारी
खुला उपसभापतितर्फ कमल ढुङ्गाना ‘कुन्दन’ २९१ मत ल्याएर विजयी हुँदा प्रतिष्पर्धी रविन दाहालले १७६ मत प्राप्त गर्नुभयो ।
उपसभापति महिलातर्फ अमृता लिम्बूले २७८ मत ल्याएर विजयी हुँदा धारणा खनालले १९६ मत प्राप्त गर्नुभयो । खनाल सुन्दरहरैंचा नगरपालिका वडा नम्बर १ को वडा सदस्य हुनुहुन्छ ।
त्यस्तै, सहसचिवमा विमला कार्की खड्काले २६७ मत ल्याएर विजयी हुँदा कोमलप्रसाद लुइँटेलले २०२ मत ल्याउनुभयो ।
जिल्ला सदस्यमा कृष्णप्रसाद भट्टराईले २६५ मत ल्याएर विजयी हुँदा गोपाल कार्कीले १८६ मत ल्याउनुभयो ।
जिल्ला सदस्यमा महिलातर्फ बिन्दा दाहाल निर्विरोध निर्वाचित भइसक्नुभएको छ ।
त्यस्तै, नगर कार्यसमितिको सचिव पदमा भुवनसिंह आलेमगर निर्विरोध निर्वाचित भइसक्नुभएको छ ।
नगर सदस्यमा नुतनकुमारी साह, रबिन बजगाईँ, सुजन थापा, रविना रोक्का र खम्बसिंह दमाई पनि निर्विरोध निर्वाचित भइसक्नुभएको छ ।
