काठमाडौंः पहिलो पटक बुक बिल्डिङबाट जारी भएको सर्वोत्तम सिमेन्टको आइपीओ तत्कालका लागि रोक्न माग भएको छ । कम्पनीको वित्तीय सूचकका आधारमा क्षमता भन्दा उच्च मूल्यमा आइपीओ जारी गरेको भन्दै रोक्न आयोजना प्रभावित क्षेत्रकी स्थानीय बासिन्दा सुनिता नेपालले अर्थ मन्त्रालय र नेपाल धितोपत्र बोर्डमा निवेदन दिएकी छिन् ।
सर्वोत्तम सिमेन्टले सार्वजनिक गरेको खुद मुनाफामा नेपाल सरकारको राजस्व छुटको समेत हिस्सा रहेको उनले दिएको निवेदनमा उल्लेख गरिएको छ । कम्पनीले आयोजना प्रभावित क्षेत्रका स्थानीय बासिन्दाका लागि प्रतिकित्ता ३६० रुपैयाँ ९० पैसाका दरले आइपीओ बिक्री खुला गरिरहेको छ । आयोजना प्रभावित क्षेत्र पाल्पा जिल्ला रिब्दिकोटमा खानी सञ्चालन गरेका कारण स्थानीयको जनजीवन कष्टकर बनेको भन्दै छुट नदिए खानी उत्खनन् नै बन्द गर्नेसम्मको चेतावनी नेपालले दिएकी छिन् । उनले स्थानीय बासिन्दाले १ सय अंकित मूल्यमा नै आइपीओ भर्न पाउने व्यवस्थाको माग गर्दै निवेदन दिएकी छिन् । नेपालले सर्वोत्तम सिमेन्टसँग सूचनाको हक प्रयोग गरेर सूचना माग गर्दा पनि कम्पनीले सूचना लुकाएको भन्दै कम्पनीको नियतप्रति नै आशंका गरेकी छिन् ।
धितोपत्र नियमावली २०७३ को दफा २६ मा धितोपत्र निष्कासन गर्ने कम्पनीले लगानीकर्तालाई आवश्यक सूचना तत्काल दिनुपर्ने व्यवस्था गरेको छ । उनले माघ १० गते उक्त निवेदन अर्थ मन्त्रालय र धितोपत्र बोर्डलाई बुझाएकी हुन् ।
