विराटचोकः केही सांसदहरुले ल्यापटपमार्फत् शेयर कारोबार गर्ने गरेको सूचना आएको भन्दै सभामुख डोलप्रसाद अर्यालले त्यस्ता गतिविधि नगर्न सांसदहरुलाई सचेत गराएका छन् ।
बुधबारको कार्यव्यवस्था परामर्श समितिको बैठकमा संसद्को मर्यादा र गरिमाका साथै सांसदहरुको अनुशासन लगायतका विषयमा छलफल भएको थियो । सो छलफलको क्रममा सभामुख अर्यालले ड्रेसकोड पालना गर्न\ गराउन र अनुशासनमा राख्न सम्बन्धित दलका प्रमुख सचेतक र सचेतकहरूलाई भनेका थिए ।
संसद्को मर्यादा र गरिमा कायम राख्नुपर्ने भन्दै सभामुख डोलप्रसाद अर्यालले बैठकमा सहभागी हुँदा सांसदहरूले आफ्नो जिम्मेवारी र आचरणप्रति गम्भीर हुनुपर्ने बताएका छन् ।
साथै सभामुख अर्यालले सांसदहरूको पोशाक, अनुशासन र व्यवहारसँगै संसद् बैठकमा देखिएका केही गतिविधिबारे पनि ध्यानाकर्षण गराएका थिए ।
बैठक चलिरहेका बेला केही सांसदहरूले ल्यापटप प्रयोग गरेर शेयर कारोबार गरेको सूचना आएको र संसद् भवनको लबीमा अनावश्यक भीडभाड गर्ने गरेको विषयमा सभामुखले असन्तुष्टि जनाएका थिए ।
