बुटवलः नेपाल भूमिहीन सुकुम्बासी तथा अव्यवस्थित बसोबासी संघर्ष समिति रुपन्देहीको आयोजनामा देशभरका सुकुम्बासीले आज रुपन्देहीको बुटवलमा विरोध प्रदर्शन गरेका छन् । सरकारले वर्षौंदेखि बसोबास गर्दै आएका अव्यवस्थित बसोबासी तथा भूमिहीन हटाउन नहुने उनीहरूको माग छ ।
बुटवलको राजमार्ग चौराहाबाट प्रदर्शन शुरु भएको प्रदर्शन तथा र्याली मिलनचोक, बसपार्क, पुष्पलाल पार्क हुँदै ट्राफिक चोकमा पुगेर कोणसभामा परिणत भएको थियो । प्रदर्शनमा विशेष गरी तराईका २२ जिल्लाका सुकुम्बासी सहभागी भएको बताइएको छ ।
दीर्घकालीन व्यवस्थाको योजना नगरी हतारमा बस्तीमा डोजर चलाएपछि देशभरका करिब १२ लाखभन्दा बढी परिवारका झन्डै ५० लाख नागरिक प्रभावित भएको उनीहरुको दाबी छ ।
विकल्पबिना सुकुम्बासी तथा अव्यवस्थित बसोबासीका घरटहरामा डोजर चलाएको, लखेट्ने कार्य गरेकाले प्रदर्शन गरिएको बताइएको छ ।
