काठमाडौंः भारतमा निपा भाइरसको सङ्क्रमण बढेपछि सरकारले निपा भाइरसको नमूना सङ्कलन र परीक्षणका लागि अन्तरिम निर्देशिका बनाएको छ ।
इपिडिमियोलोजी तथा रोग नियन्त्रण महाशाखाले यसको नमुना सङ्कलन र परीक्षणका लागि अन्तरिम निर्देशिका बनाएको हो । सरकारले बनाएको यो निर्देशिकाले ज्वरो र श्वासप्रश्वासमा गम्भीर समस्या देखिएका, निपा भाइरसको प्रभावित क्षेत्र अर्थात्, भारतबाट फर्किएका र अन्य यो भाइरससँग सम्बन्धित मिल्दोजुल्दो लक्षण देखिएका व्यक्तिलाई शंकास्पद निपा केसका रूपमा राखेको छ ।
बंगलादेश र भारतको पश्चिम बंगाल तथा केरलाजस्ता यो भाइरसको संक्रमण भएका क्षेत्रबाट फर्किएकाहरूलाई विशेष सतकर्ता अपनाउन पनि निर्देशिकामा भनिएको छ । निर्देशिका अनुसार शंकास्पद तथा सम्भावित केसलाई तुरुन्तै आइसोलेसनसहित अस्पताल भर्ना गर्ने, स्वास्थ्यकर्मीले व्यक्तिगत सुरक्षा सामग्री (पीपीई) प्रयोग गर्नुपर्ने पनि महाशाखाले जनाएको छ ।
