इटहरीः सुनसरीको इटहरी–२ आयुर्वेदिक टोलस्थित त्रिनेत्र अध्यात्म चिन्तन केन्द्र, कोशी प्रदेशद्वारा स्थापित १०८ शिवलिङ्ग प्राण प्रतिष्ठासहित आयोजित श्रीमद्भागवत धान्याञ्चल जीवनदर्शन सत्सङ्ग कार्यक्रमको आयव्यय सार्वजनिक गरिएको छ ।
मंगलबार केन्द्रको कोशी प्रदेश कार्यालय परिसरमा पत्रकार सम्मेलन गरी सार्वजनिक गरिएको आयव्ययअनुसार आयोजक संस्था १६ लाख रुपैयाँ घाटामा देखिएको छ ।
सो केन्द्रले गत कात्तिक १४ गतेदेखि २१ गतेसम्म श्रीमद्भागवत ज्ञान महायज्ञ, सवा ११ लाख दियो प्रज्ज्वलन तथा विशेष शंखघोषसहित विविध धार्मिक कार्यक्रम सम्पन्न गरेको थियो । १०८ शिवलिङ्ग निर्माण तथा भूमिदान लगायत पूर्वाधारमा ४५ लाख ९४ हजार ३०४ रुपैयाँ आम्दानी भएको पत्रकार सममेलनमा बताइएको छ । १०८ शिवलिङ्ग, घण्ट, नन्दी, हनुमान, शिव मूर्ति, आसन, रुद्राक्ष शिवलिङ्ग तथा ९ मिटर अग्लो त्रिशुल निर्माणमा ४६ लाख ३१ हजार ४० रुपैयाँ खर्च भएको जानकारी दिइएको छ ।
असारदेखि कात्तिक २१ गतेसम्मको श्रीमद्भागवत ज्ञान महायज्ञ तथा अन्य अनुष्ठानमा २३ लाख १८ हजार १३३ रुपैयाँ खर्च भएको छ । चतुर्मास यज्ञमा २ लाख ७१ हजार ४०५ सङ्कलन भएको र ६ लाख ३१ हजार ५४१ खर्च भएको जनाइएको छ । केन्द्रले जम्मा ५८ लाख १६ हजार ७८९ रुपैयाँ आम्दानी तथा ७५ लाख ८० हजार ७१४ रुपैयाँ खर्च गरेको जनाइएको छ । केन्द्रलाई लागेको घाटा रकमका लागि कोशी प्रदेश सरकार तथा इटहरी उप–महानगरपालिकाको समन्वयमा व्यवस्थापन गरिने पत्रकार सम्मेलनमा जनाइएको छ ।
