उर्लाबारीः उर्लाबारी उद्योग वाणिज्य संघको आयोजनामा भोलि फागुन १५ गतेदेखि ११ दिनसम्म उर्लाबारी कृषि, औद्योगिक तथा पर्यटन महोत्सव २०८१ सञ्चालन हुने भएको छ ।
आयोजकले महोत्सव सञ्चालन हुने स्थानमा हिजो पत्रकार सम्मेलन गरी दिएको जानकारीअनुसार स्थानीय व्यापार, पर्यटन र संस्कृतिको प्रवद्र्धनमा योगदान पु¥याउन महोत्सवको आयोजना गर्न लागिएको हो ।
आयोजक उर्लाबारी उद्योग वाणिज्य संघका अध्यक्ष तारामान सिरिङ लिम्बूका अनुसार महोत्सवको उद्घाटन कोशी प्रदेशका मुख्यमन्त्री हिक्मतकुमार कार्कीले गर्नुहुने भएको छ । महोत्सवबाट १८ लाख रुपैयाँ बचत हुने अनुमान गरिएको र सो रकम आगो निभाउने उपकरण रिफिल गर्ने मेसिन खरिद गर्ने योजना रहेको अध्यक्ष लिम्बूले बताउनुभयो ।
महोत्सव व्यवस्थापन समितिका संयोजक चन्द्रबहादुर भट्टराई (भरत) का अनुसार महोत्सवमा १५३ वटा स्टलहरू रहनेछन् । जसमा कृषि, उद्योग, पर्यटन क्षेत्रका प्रदर्शनीहरू, सांस्कृतिक कार्यक्रमहरू, व्यापारिक स्टल रहनेछन् । ३ लाखभन्दा बढी दर्शकहरूको सहभागी हुने र करिब १५ करोड रुपैयाँको कारोबार हुने अपेक्षा गरिएको उहाँले जानकारी दिनुभयो ।
