विराटचोकः नवनियुक्त प्रधानमन्त्री खड्गप्रसाद शर्मा ओलीको नेतृत्वमा गठित २२ सदस्यीय मन्त्रिपरिषद्मा १० जना नयाँ मन्त्री हुनुहुन्छ । जसमा एमालेका ४ जना र कांग्रेसका ६ जना हुनुहुन्छ ।
सकारमा कांग्रेसका १०, एमालेका ८, जनता समाजवादीका २ र लोसपाका १ जना मन्त्री छन् । मन्त्रिपरिषद समावेशी बनेको छैन । २२ सदस्यीय मन्त्रिपरिषदमा एक जना पनि दलित समावेश गरिएको छैन ।
कांग्रेसका प्रकाशमान सिंह, रमेश लेखक र दीपक खड्का यसअघि पनि पटक–पटक मन्त्री भइसकेका व्यक्ति हुन् । सिंह काठमाडौं क्षेत्र नम्बर १, लेखक कञ्चनपुर ३ र खड्का संखुवासभाबाट प्रतिनिधि सभा सदस्यमा निर्वाचित हुनुभएको हो ।
कांग्रेसबाट मन्त्री हुने बाजुराका बद्री पाण्डे, डडेलधुराकी आरजु राणा देउवा, धादिङका रामनाथ अधिकारी, सप्तरीका तेजुलाल चौधरी, मुगुका ऐनबहादुर शाही र तनहुँका प्रदीप पौडेल पहिलो पटक मन्त्री हुनुभएको हो ।
उहाँहरुमध्ये कांग्रेस सहमहामन्त्री पाण्डे बाजुराबाट विजयी हुनुभएको हो । राणा समानुपातिक सांसद हुनुहुन्छ भने अधिकारी धादिङ २, चौधरी सप्तरी ४, शाही मुगु र पौडेल काठमाडौं ५ बाट निर्वाचित हुनुभएको हो ।
पाण्डे पर्यटन, राणा परराष्ट्र, अधिकारी कृषि, चौधरी युवा, शाही वन र पौडेल स्वास्थ्य मन्त्री बन्नुभएको छ ।
एमालेबाट मन्त्री हुने ८ जनामध्ये आधा पटकपटक मन्त्री भइसकेका व्यक्ति हुनुहुन्छ ।
सोलुखुम्बुका मानवीर राई रक्षा मन्त्री तथा कास्कीकी विद्या भट्टराई शिक्षा मन्त्री हुनुभएको छ । एमाले राष्ट्रिय सभा दलका नेता झापाका देवेन्द्र दाहाल भौतिक पूर्वाधार मन्त्री बन्दा पर्साका राजकुमार गुप्ता संघीय मामिला तथा सामान्य प्रशासन मन्त्री नियुक्त हुनुभएको छ । उहाँहरु पहिलो पटक मन्त्री बन्नुभएको हो ।
