काठमाडौंः नेपाल विद्यार्थी संघको पहलमा ५ वटा कम्पनीसँग इन्टर्नसिप गर्ने विद्यार्थीलाई न्यूनतम १५ हजार पारिश्रमिक दिने सम्झौता भएको नेविसंघले जनाएको छ ।
संघका अध्यक्ष दुजाङ शेर्पाका अनुसार एरोनोटिकल इन्जिनियरिङ अध्ययनरत ३ जना विद्यार्थीलाई समिट एयरमा, सिभिल इन्जिनियरिङ पढ्ने २ जनालाई रसुवा कन्स्ट्रक्सनमा, सिभिल इन्जिनियरिङकै २ जनालाई पीएस कन्स्ट्रक्सनमा पारिश्रमिकसहित इन्टर्नको सम्झौता गरिएको छ ।
त्यस्तै गोल्डेन गुड्स एन्ड शेर्पा कन्स्ट्रक्सनमा सिभिल इन्जिनियरिङ पढ्ने २ जनाले, रोहित एन्ड छिरिङ कन्स्ट्रक्सनमा सिभिल इन्जिनियरिङ पढ्ने १ जनाले र मेकानिकल इन्जिनियरिङ पढ्ने १ जनाले यही वर्षदेखि लागू हुने गरी इन्टर्न गर्दा न्यूनतम पारिश्रमिक पाउने भएका हुन् ।
पुलचोक इन्जिनियरिङ क्याम्पस प्रमुख इन्द्रप्रसाद आचार्य, कम्पनीका प्रतिनिधि, नेविसंघका अध्यक्ष दुजाङ शेर्पा, केन्द्रीय सदस्य तथा इन्टर्नसिप संयोजक पारस बस्नेतबीच पुलचोक क्याम्पसमा सम्झौता भएको हो । सम्झौता अनुसारको विद्यार्थी संख्या क्याम्पसले प्राथमिकताको आधारमा छनोट गरेर पठाउने भएको छ ।
पुलचोक इन्जिनियरिङ क्याम्पसले सबै विषयका विद्यार्थीलाई ६ महिना अनिवार्य इन्टर्न गर्नुपर्ने व्यवस्था गरेको छ । क्याम्पस प्रमुख इन्द्रप्रसाद आचार्यले अहिलेसम्म विद्यार्थीले निःशुल्क इन्टर्न गर्नुपर्ने बाध्यता रहेकोमा नेविसंघले चालेको कदम सकारात्मक भएको बताउनुभयो ।
हाल अधिकांश विद्यार्थी सामान्य खाजाको भरमा इन्टर्न गर्दै आएका छन् । केही कम्पनीले भने मासिक ५ देखि ७ हजार रुपैयाँ भत्ता दिने गर्थे ।
