विराटचोकः मोरङको विराटचोकस्थित ब्रह्माकुमारी राजयोग उपसेवा केन्द्रमा कमला पराजुलीद्वारा लिखित ‘ॐ शान्ति’ कविता कृति लोकार्पण गरिएको छ ।
ब्रह्माकुमारी कविता पोखरेलको अध्यक्षता तथा साहित्यकार छवि वैरागी घिमिरेको प्रमुख आतिथ्यतामा आयोजित कार्यक्रममा ७२ वर्षीया पराजुलीको कविता कृति विमोचन भएको हो ।
आफ्ना अनुभव, आध्यात्मिक चिन्तन र अनुभूतिलाई कवितामार्फत् प्रस्तुत गर्ने क्रममा कृति तयार भएको कृतिकार पराजुलीले बताउनुभयो ।
विभिन्न कार्यक्रम तथा ध्यान केन्द्रमा कविता सुनाउँदै आएकी पराजुलीले ती रचनालाई पुस्तकको रुपमा प्रकाशन गर्नुभएको हो ।
कार्यक्रममा कोसी साहित्य कला परिषद्का अध्यक्ष साहित्यकार केशु विरहीले ‘ॐ शान्ति’ कविता सङ्ग्रहलाई ज्ञान बाँड्ने पुण्य कार्यको संज्ञा दिँदै यसले साहित्यिक यात्रामा लाग्न चाहनेलाई प्रेरणा दिने बताउनुभयो । पुस्तकले सुख हामीभित्रै रहेको सन्देश दिएको उल्लेख गर्दै उहाँले लेखकको आगामी साहित्यिक यात्राको सफलताको कामना व्यक्त गर्नुभएको थियो ।
सुन्दरहरैंचा कला साहित्य विकास समितिका अध्यक्ष डा. दीपकप्रसाद न्यौपानेले सिर्जनामा सौन्दर्य हुने उल्लेख गर्दै कविता सङ्ग्रहले शान्ति कहाँ पाइन्छ भन्ने प्रश्नको खोजी गरेको बताउनुभयो । आगामी संस्करणमा भाषिक परिष्कारसहित कृतिलाई थप विशिष्ट बनाउनुपर्ने उहाँको सुझाव थियो ।
बेलबारी कला साहित्य विकास समितिका अध्यक्ष रमेश निरौलाले वर्तमान समयमा मानिसभित्र बढ्दै गएको अशान्ति र द्वन्द्व न्यूनीकरण गर्न आध्यात्मिक चिन्तन आवश्यक रहेको बताउनुभयो । उहाँले कृतिकार पराजुलीले आध्यात्मिक गहिराइमा पुगेर कविता सिर्जना गरेको बताउनुभयो ।
कृतिकार पराजुलीले आफूले केही वर्षअघि नै कविता लेख्न शुरु गरेको र ब्रह्मकुमारी राजयोग सेवा केन्द्रको आध्यात्मिक कार्यक्रममा सुनाउने गरेको बताउनुभयो । रचना सुनाउँदा स्रोताले दिनुभएको हौसलाले आफूलाई लेख्न थप प्रेरणा मिलेको उहाँको भनाइ थियो ।
आफूलाई आध्यात्मिक चर्चा र चिन्तनका क्रममा बढी ऊर्जा र शक्ति अनुभूति हुने गरेको उल्लेख गर्दै उहाँले आफ्नै अनुभव र मनमा आएका भावलाई शब्दमा उतारेको बताउनुभयो ।
प्रमुख अतिथि साहित्यकार छवि वैरागी घिमिरेले कविता साधनाबाट निस्कने कोमल सिर्जना भएको हुनाले कविले जहाँ पनि र जेमा पनि कविता भेट्न सक्नु साधना भएको बताउनुभयो ।
कार्यक्रमको सञ्चालन कोशी साहित्य कला परिषद्का सचिव नवराज पोखरेल ‘नवशिला’ले गर्नुभएको थियो ।
