गछियाः साजीलाल माध्यमिक विद्यालयका पूर्व प्रधानाध्यापक पीताम्बर दाहालले आफ्ना स्वर्गीय २ छोराको स्मृतिमा स्थापना गरेको अक्षयकोषमार्फत् विद्यालयमा हाजिरीजवाफ प्रतियोगिता सम्पन्न भएको छ । विद्यालयको ५८ औँ वार्षिकोत्सव तथा अभिभावक दिवसको अवसर पारेर सुन्दरहरैंचका सामुदायिक विद्यालयस्तरीय प्रतियोगिता आयोजना गरिएको हो ।
प्रतियोगितामा साजीलाल माध्यमिक विद्यालय सुन्दरहरैंचा ६ पहिलो भएको छ । जनता माध्यमिक विद्यालय सुन्दरहरैंचा ९ बुधबारे दोस्रो र सुकुना माध्यमिक विद्यालय सुन्दरहरैंचा १० तेस्रो भएका छन् ।
प्रतियोगितामा विजयी विद्यार्थीलाई कार्यक्रमका प्रमुख अतिथि अक्षयकोषका संस्थापक पीताम्बर दाहाल र परिवारका सदस्यले पुरस्कार प्रदान गरेका थिए । पहिलो हुने विद्यालयलाई प्रमाणपत्रका साथमा नगद १० हजार, दोस्रो हुने विद्यालयलाई प्रमाणपत्र र नगद ७ हजार तथा तेस्रो हुने विद्यालयलाई नगद ५ हजार र प्रमाणपत्र प्रदान गरिएको विद्यालयका प्रधानाध्यापक श्यामबाबु काफ्लेले जानकारी दिए ।
स्वर्गीय श्याम दाहाल हाजिरीजवाफमा निपुण विद्यार्थी भएकाले अक्षयकोषमार्फत् विद्यालयलाई प्राप्त हुने रकमबाट हाजिरीजवाफ प्रतियोगिता गरिएको श्रीमती कमला पोखरेलले बताइन् ।
प्रतियोगितामा सुन्दरहरैंचाका १० वटा सामुदायिक विद्यालय सहभागी थिए ।
