विराटचोकः फिफा विश्वकप २०२६ को तेस्रो स्थान (कास्य पदक) को पदकको लागि भएको खेलमा इङ्गल्याण्ड विजयी भएको छ । खेलमा फ्रान्सलाई ६–४ को नतिजाले पराजित गर्दै इङ्गल्याण्डले तेस्रो स्थान हासिल गरेको हो ।
यो जीतसँगै इङ्गल्याण्ड सन् १९६६ मा विश्वकपमा विजयी भएपछिको आफ्नो सबैभन्दा उत्कृष्ट नतिजा हासिल गरेको छ । यसअघि सन् १९९० र २०१८ मा चौथो भएको इंग्ल्याण्ड एक पटक १९६६ मा मात्रै विश्वकपको विजेता बनेको छ ।
इङ्गल्याण्डको जीतमा जर्सी नम्बर ७ का स्ट्राइकर बुकायो साका नायक बने । साकाले खेलको ३७ औं, ४५ औं र ८७ औँ (पेनाल्टी) मिनेटमा गोल गर्दै शानदार ह्याट्रिक पूरा गरे ।
इङ्गल्याण्डका लागि खेलको तेस्रो मिनेटमै डिक्लान राइसले सुरुवाती गोल गरेका थिए भने १८ औं मिनेटमा राइसकै असिस्टमा डिफेन्डर एज्री कोन्साले दोस्रो गोल गरेका थिए ।
खेलको अन्तिम समयमा फ्रान्सले लगातार गोल फर्काएर दबाब सिर्जना गरे पनि थपिएको समयको आठौं मिनेट अर्थात् ९०+८ औं मिनेटमा जुड बेलिङ्घमले गोल थप्दै इङ्गल्याण्डको ६–४ को जीत पक्का गरेका थिए ।
मध्यान्तरअघि ४–० को विशाल गोल अन्तरले पछि परेको फ्रान्सले मध्यान्तरपछि उत्कृष्ट पुनरागमनको प्रयास गरेको थियो । फ्रान्सका लागि स्टार फरवार्ड किलियन एम्बाप्पेले ४८ औं र ६६ औं मिनेटमा दुई गोल गरे भने ५४ औं मिनेटमा एम्बाप्पेकै पासमा ब्राड्ली बारकोलाले गोल गरेका थिए । खेलको इन्जुरी समय अर्थात् ९०+६ औं मिनेटमा ओसमान डेम्बेलेले गोल गरेपछि फ्रान्सले खेललाई ४–५ को अत्यन्तै रोमाञ्चक स्थितिमा ल्याएको थियो । यद्यपि, खेलको अन्तिम सेकेन्डमा बेलिङ्घमले गोल गरेपछि फ्रान्सको ऐतिहासिक पुनरागमनको प्रयास असफल भएको थियो ।
खेलमा पराजित भए पनि फ्रान्सेली कप्तान किलियन एम्बाप्पेले दुईवटा कीर्तिमान आफ्नो नाममा लेखाउन सफल भएका छन् । आजको खेलमा दुई गोल गरेसँगै उनी फिफा विश्वकप इतिहासकै सर्वकालीन सर्वाधिक गोलकर्ता बनेका छन् । उनले समग्र विश्वकप करियरमा आफ्नो गोल संख्या २२ पुर्याउँदै अर्जेन्टिनाका लियोनेल मेस्सीको २१ गोलको रेकर्डलाई भंग गरेका हुन् ।
जारी विश्वकपमा आफ्नो गोल सङ्ख्या १० पुर्याउँदै एम्बाप्पेले यस संस्करणको गोल्डेन बुटको दौडमा पनि एकल अग्रता बनाएका छन् । यद्यपि मेस्सीले फाइनल खेल खेल्न बाँकी नै छ ।
