विराटचोकः स्पेनले २०२६ फिफा विश्वकपको अन्तिम–१६ मा पोर्चुगललाई १–० ले पराजित गर्दै विश्वकप इतिहासमा लगातार सबैभन्दा धेरै खेलमा गोल नखाएको नयाँ कीर्तिमान बनाएको छ ।
डलासमा सोमबार भएको खेलमा स्पेनले लगातार छ खेलसम्म विपक्षीलाई गोल गर्न नदिई नयाँ इतिहास रचेको हो ।
स्पेनका गोलकिपर उनाइ सिमोनविरुद्ध पछिल्ला ६०९ मिनेटदेखि कुनै पनि खेलाडीले गोल गर्न सकेका छैनन् ।
यो कीर्तिमानको सुरुआत सन् २०२२ को विश्वकपबाट भएको थियो । त्यसबेला स्पेनले अन्तिम–१६ मा मोरक्कोसँग निर्धारित समयमा ०–० को बराबरी खेलेको थियो ।
पेनाल्टी सुटआउटमा पराजित भए पनि यो खेललाई आधिकारिक रूपमा क्लिन सिटका रूपमा गणना गरिएको थियो ।
जारी विश्वकपमा स्पेनले पहिलो खेलमा केप भर्डसँग ०–० को बराबरी खेलेको थियो ।
त्यसपछि साउदी अरेबियालाई ४–०, उरुग्वेलाई १–० र राउन्ड अफ ३२ मा अस्ट्रियालाई ३–० ले पराजित गर्दै लगातार पाँचौँ क्लिन सिट पूरा गरेको थियो ।
अन्तिम–१६ मा पोर्चुगललाई पनि गोल गर्न नदिँदै १–० को जीत निकालेपछि स्पेनले लगातार छ खेलमा क्लिन सिट राख्ने विश्वकप इतिहासकै पहिलो टोली बनेको हो ।
