विराटचोकः जल तथा मौसम विज्ञान विभागका अनुसार हाल देशभर मनसुनी वायुको प्रभाव रहेको छ । आज बिहान बागमती, गण्डकी, लुम्बिनी र सुदूरपश्चिम प्रदेशका विभिन्न भूभागमा वर्षा भइरहेको छ ।
जल तथा मौसम पूर्वानुमान महाशाखाका अनुसार पछिल्लो एक घन्टामा कञ्चनपुरको दोधारामा सबैभन्दा धेरै १७.४ मिलिमिटर र हनुमाननगरमा १२.४ मिलिमिटर वर्षा भएको छ । नुवाकोटको त्रिशूलीमा १५.८ मिलिमिटर वर्षा भएको छ ।
पछिल्लो २४ घन्टामा पनि बढी वर्षा हुनेमा कञ्चनपुरको दोधारा रहेको छ । दोधारामा १४९.६ मिलिमिटर वर्षा भएको छ । कपिलवस्तुको वाणगंगामा ११७.६ मिलिमिटर र काठमाडौंको नागार्जुनमा ४६.६ मिलिमिटर वर्षा भएको छ ।
महाशाखाका अनुसार आज दिउँसो देशभर साधारणतया बादल लाग्ने छ । दिउँसो देशका हिमाली र पहाडी भू–भागका केही स्थानमा मेघगर्जन र चट्याङ्ग सहित मध्यमसम्मको वर्षा र हिमपातको सम्भावना छ ।
लुम्बिनी प्रदेशको तराई भू–भागका केही स्थानमा, बागमती, गण्डकी र सुदुरपश्चिम प्रदेशको तराई भू–भागका थोरै स्थानमा मेघगर्जन र चट्याङ्ग सहित मध्यमसम्मको वर्षाको सम्भावना रहेको महाशाखाले जनाएको छ ।
मधेस प्रदेश र कोशी प्रदेशका तराईको एक–दुई स्थानमा पनि मेघगर्जन र चट्याङ्ग सहित मध्यमसम्मको वर्षाको सम्भावना रहेको छ । बागमती, गण्डकी र लुम्बिनी प्रदेशको पहाडी भू–भागको एक–दुई स्थानमा भारी वर्षा हुने पूर्वानुमान छ ।
आज राति पनि देशभर साधारणतया बादल लाग्ने तथा लुम्बिनी र सुदूरपश्चिम प्रदेशको तराई भू–भागका साथै देशको पहाडी भू–भागका केही स्थान, बागमती र गण्डकी प्रदेशको तराई भू–भागका थोरै स्थानमा तथा कोशी र मधेश प्रदेशका तराई भू–भागका एक–दुई स्थानमा मेघगर्जन र चट्याङसहित मध्यमसम्मको वर्षाको सम्भावना रहेको महाशाखाले जनाएको छ ।
गण्डकी प्रदेशको पहाडी भूभाग र सुदूरपश्चिम प्रदेशका पहाडी र तराई भू–भागका एक–दुई स्थानमा भारी वर्षाको सम्भावना रहेको महाशाखाले जनाएको छ ।
महाशाखाका अनुसार देशभर मनसुन सक्रिय रहेको छ ।
