गोठगाउँः मोरङको सुन्दरहरैंचा–७ गोठगाउँमा उद्यमशीलता विकास तालिम कार्यक्रम शुरु भएको छ । सोमबार शुरु भएको तालिम सात दिनसम्म चल्ने आयोजकले जनाएको छ ।
तालिम संयोजक संस्था सुन्दरहरैंचा महिला मञ्चकी अध्यक्ष विमला अधिकारीका अनुसार वडाका उद्यम गर्ने चाहना भएका ३२ जना महिला तालिममा सहभागी भएका छन् ।
आयोजक संस्था घरेलु तथा साना उद्योग कार्यालय कोशी प्रदेशले २५ जनालाई तालिम दिने निर्णय गरे पनि आवेदन दिने र व्यवसाय गर्न इच्छुक सबैलाई तालिममा सहभागी गराइएको मञ्चकी सचिव जानुका ओझा बताउनुहुन्छ ।
तालिमको उद्घाटन समारोहलाई सम्बोधन गर्नुहुँदै प्रमुख अतिथि सुन्दरहरैंचा नगरपालिका वडा नम्बर ७ का वडाध्यक्ष भुवनसिंह आलेमगरले तालिमको महत्व बुझेर व्यावसायिक बन्न प्रशिक्षार्थीलाई आग्रह गर्नुभयो ।
घरेलु तथा साना उद्योग कार्यालय कोशी प्रदेशका प्रमुख भवानी घिमिरेले आफूले सिकेको सीप कहिल्यै खेर नजाने बताउँदै सीप आर्जनपछि सफल व्यवसायी बन्न सुझाव दिनुभयो ।
प्रशिक्षक यमुना भण्डारीले दिइरहनुभएको प्रशिक्षणमा सुन्दरहरैंचा नगरपालिका वडा नम्बर ७ का ३२ जना प्रशिक्षार्थी सहभागी हुनुहुन्छ ।
