विराटचोकः आज दिनभरजसो स्थिर रहेको शेयर बजारमा कारोबार रकमले अढाइ अर्ब पनि पार गरेन । आज नेपाल स्टक एक्सचेञ्ज (नेप्से)परिसूचक ०.०३ प्रतिशत अर्थात् १.०३ अंकले घटेर २७३०.९१ विन्दुमा अडिएको छ ।
आज ३३९ वटा कम्पनीका ५८ लाख २८ हजार ६०४ कित्ता शेयर ४३ हजार ३०९ पटक किनबेच हुँदा २ अर्ब ४५ करोड ८ लाख ७८ हजार ४४९ रुपैयाँको शेयर कारोबार भएको छ ।
आज ५ वटा समूहमा हरियाली छाउँदा अन्य समूह सर्वाधिक अर्थात् ०.३१ प्रतिशतले बढेको छ । निर्जीवन बीमा समूह आज सर्वाधिक अर्थात ०.६९ प्रतिशतले घटेको छ ।
न्यून रुपैयाँको कारोबार भएको दिन आज साहस उर्जाको सर्वाधिक अर्थात ८ करोड ४३ लाख ८९ हजार ८६० रुपैयाँको शेयर किनबेच भएको छ । रिलायन्स स्पिनीङ मिल्स, एसवाई प्यानल नेपाल, अपि पावर र शिवम् सिमेन्ट उच्च कारोबार गर्ने अन्य कम्पनीमा परेका छन् ।
आज ईङ्वा हाईड्रोको शेयरमूल्य सर्वाधिक अर्थात् ८.४२ प्रतिशतले बढ्दा एसवाई प्यानल नेपालको शेयरमूल्य सर्वाधिक अर्थात ३.६० प्रतिशतले घटेको छ ।
बजार घटेसँगै समग्र बजार पूँजीकरण ४६ खर्ब ५७ अर्ब ७० करोड ५८ लाख १९ हजार ७२५ रुपैयाँ कायम भएको छ ।
