गोठगाउँः सुन्दरवाटिका एकेडेमीले शैक्षिक क्षेत्रमा नयाँ अभ्यासको शुरुवात गरेको छ । नगरका अधिकांश विद्यालयले शैक्षिक वर्षको अन्त्यतिर अभिभावक दिवस आयोजना गरी विभिन्न तह पार गरेका विद्यालयलाई दीक्षित गर्ने गरेका छन् । तर सुन्दरवाटिकाले भने शैक्षिक सत्र शुरु हुनासाथ तह पार गरेका विद्यार्थीलाई दीक्षित गर्नुका साथै कक्षा उत्तीर्ण विद्यार्थीलाई सम्मान गरेको छ ।
नौलो अभ्यासकै रूपमा विद्यालयले आफ्ना विद्यार्थीका हजुरबुबा र हजुरआमालाई पनि सम्मान गरेको छ । बैशाख २७ र २८ गते दुई दिन आयोजित कार्यक्रममा २७ गते विद्यालयले विद्यार्थीका १०० जनाभन्दा बढी हजुरबुबा र हजुरआमालाई खादा, टीका र उपहार दिएर सम्मान गरेको थियो । २८ गते सुन्दरहरैंचामा क्रियाशील ४ जना सञ्चारकर्मीलाई विद्यालयले खादा, प्रमाणपत्र र नगद प्रदान गरी सम्मान गरेको थियो ।
त्यत्तिमात्रै होइन अन्य विभिन्न विद्यालयबाट आफ्नो विद्यालयमा आएका नयाँ विद्यार्थीलाई स्वागत पनि विद्यालयले गरेको छ ।
कार्यक्रममा विभिन्न ७ आइडलका विजेतालाई सम्मान गरिएको थियो । कार्यक्रममा विद्यार्थीले नाटक प्रतियोगितामा पनि भाग लिएका थिए ।
पहिलो दिन भएको कार्यक्रमका प्रमुख अतिथि सुन्दरहरैंचा नगरपालिकाका नगरप्रमुख केदारप्रसाद गुरागाईँले सुन्दरवाटिकाले शिक्षा क्षेत्रमा पुर्याएको योगदानको प्रशंसा गर्दै विद्यार्थीको निरन्तर उन्नतिको कामना गर्नुभएको थियो ।
विद्यालयले पूर्व प्राथमिक तह पार गरी कक्षा १ मा पुगेका ५० जना विद्यार्थीलाई दीक्षान्त समारोहमा सहभागी गराएको थियो । उनीहरुलाई कार्यक्रमका प्रमुख अतिथि नगरप्रमुख केदारप्रसाद गुरागाईँ तथा अन्य अतिथिले संयुक्त रूपमा दीक्षित गर्नुभएको थियो । हरेक कक्षा उत्तीर्ण हुने सम्पूर्ण विद्यार्थीलाई कार्यक्रममा सम्मान गरी प्रमाणपत्र प्रदान गरिएको थियो ।
अन्य विद्यालयबाट आफ्नो विद्यालयमा अध्ययनका लागि यस वर्ष आएका ६८ जना विद्यार्थीलाई विद्यालयले स्वागत गरेको थियो । उनीहरुलाई प्रमुख अतिथिलगायत अन्य अतिथिले टीका र खादा लगाएर स्वागत गर्नुभएको थियो ।
विद्यालयले विद्यालयमा कार्यरत सम्पूर्ण शिक्षक तथा कर्मचारीलाई पनि खादा र उपहार प्रदान गरी सम्मान गरेको थियो ।
कार्यक्रममा आफ्नो भनाइ राख्नुहुँदै विद्यार्थीका अभिभावक रेनुका पोखरेल र शकुन दियालीले विद्यालयले विद्यार्थीको सर्वाङ्गीण विकासका लागि विभिन्न अतिरिक्त क्रियाकलाप गर्ने हुनाले अभिभावकको रोजाइमा सुन्दरवाटिका पर्ने गरेको बताउनुभयो ।
कार्यक्रममा अभिभावक, विद्यार्थी तथा शिक्षक कर्मचारीले गायन र नृत्य प्रस्तुत गर्नुभएको थियो । विद्यार्थीले प्रस्तुत गरेका नाटकले अभिभावकको मन जितेको थियो । विद्यालयले विद्यार्थीबीच नाटक प्रतियोगिता गराएको थियो ।
उत्तीर्ण सबै कक्षाका विद्यार्थीलाई सम्मान, तह पार गर्ने विद्यार्थीका लागि दीक्षान्त, विद्यार्थीका हजुरबुबा तथा हजुरआमालाई सम्मान, सञ्चारकर्मी सम्मान, नवआगन्तुक विद्यार्थीलाई स्वागत, विभिन्न ७ विधामा प्रतियोगिता गरी आइडल छान्ने प्रक्रिया तथा विद्यार्थीले प्रस्तुत गरेको नाटक प्रतियोगितामा राखिएको विषयवस्तु र विद्यार्थीको अभिनय क्षमताको कार्यक्रममा उपस्थितले प्रशंसा गरेका थिए ।
