काठमाडौंः अखिल नेपाल फुटबल संघ (एन्फा) का अध्यक्ष पंकजविक्रम नेम्बाङसहित २४ जनाको पासपोर्ट कालोसूचीमा राखी विदेश भ्रमणमा रोक लगाइएको छ ।
अध्यागमन विभागका अनुसार शुक्रबार एन्फाका २४ जनाको पासपोर्ट कालोसूचीमा राख्न निवेदन प्राप्त भएको हुनाले सोही अनुसार कालोसूचीमा राखिएको छ ।
सो पत्र युवा तथा खेलकुद मन्त्रालय हुँदै गृह मन्त्रालय पुगेको थियो । त्यसपछि गृह मन्त्रालयबाट अध्यागमनमा पत्र पुगेपछि एन्फाका पदाधिकारीहरुको पासपोर्ट कालोसूचीमा राखिएको बताइएको छ ।
पछिल्लो समय खेलकुद परिषद र एन्फाबीच विवाद छ । आफ्नो निर्देशन विपरित निर्वाचन गर्न लागेको भन्दै एन्फामाथि खेलकुद परिषदले तीन महिना निलम्बन गरेको थियो ।
साथै एन्फामा अनिमितता भएको भन्दै अख्तियार दुरुपयोग अनुसन्धान आयोगमा परेका उजुरीको विषयमा खेलकुद मन्त्रालयमा पत्र प्राप्त भएका थिए । त्यसपछि राष्ट्रिय खेलकुद परिषदले छानविनका लागि उपसमिति गठन गरेको थियो । सो समितिले नै आर्थिक विषयमा छानविन गर्नुपर्ने भन्दै एन्फा पदाधिकारीको पासपोर्ट कालोसूचीमा राख्दै विदेश जान नदिन सुझाव दिएको थियो ।
परिषदले एन्फाको विषयमा छानविन गर्नका लागि कार्यकारी सदस्य कमल भट्टराईको संयोजकत्वमा तीन सदस्यीय छानबिन उपसमिति गठन गरेको थियो ।
