विराटचोकः गत साता नेप्से स्थिर बनेको छ । सातामा ४ दिन कारोबार हुँदा नेप्से ०.६३ अङ्क अर्थात् ०.०२ प्रतिशतमात्रै बढेको छ । अघिल्लो साता २८३७.७७ बिन्दुमा बन्द भएको नेप्से गत साता २८३८.४० बिन्दुमा रोकिएको हो ।
४ कारोबारमध्ये २ दिन नेप्से बढेको थियो भने २ दिन घटेको थियो । सातामा कारोबार रकम भने घटेको छ । अघिल्लो साता दैनिक औसतमा ९ अर्ब ५४ करोड रुपैयाँको शेयर किनबेच भएकोमा गत साता दैनिक औसतमा ८ अर्ब ९९ करोड रुपैयाँको मात्र शेयर किनबेच भएको छ ।
सातामा नेप्सेको कुल बजार पूँजीकरण सामान्य बढेको छ । अघिल्लो साताको अन्तिम कारोबार दिन ४८ खर्ब २४ अर्ब रुपैयाँ रहेको नेप्सेको कुल बजार पूँजीकरण गत साता ४८ खर्ब ४१ अर्ब रुपैयाँ पुगेको छ ।
साताभरमा ५ उपसमूहको परिसूचक बढेको छ भने ८ उपसमूहको परिसूचक घटेको छ । होटल तथा पर्यटन उपसमूहको परिसूचक ५.१३ प्रतिशत बढेको छ । अन्य उपसमूहको परिसूचक सर्वाधिक २.८४ प्रतिशत घटेको छ ।
गत साता २ कम्पनीको २१ लाख ९२ हजार ३८० कित्ता नेप्सेमा सूचीकृत भएको छ । कालिका लघुवित्त वित्तीय संस्था र शिखर इन्स्योरेन्सको बोनस शेयर नेप्सेमा सूचीकृत भएको हो ।
साताभरमा भर्खरै आइपीओ सूचीकृत भएको सूर्यकुण्ड हाइड्रो इलेक्ट्रिकको शेयरमूल्य सर्वाधिक ४६.४० प्रतिशत बढेको छ । क्रेष्ट माइक्रोलाइफ इन्स्योरेन्सको शेयरमूल्य सर्वाधिक ५.९३ प्रतिशत घटेको छ ।
