विराटचोकः इन्द्रपुर क्रिकेट क्लब सुन्दरहरैंचाको आयोजनामा आजदेखि मोरङ मोरङको सुन्दरहरैंचामा “सुन्दरहरैंचा टी २० कप क्रिकेट प्रतियोगिता” आयोजना हुने भएको छ ।
बैशाख ६ गतेसम्म सुन्दरहरैंचा नगरपालिका वडा नम्बर ८, सलकपुरस्थित खेलमैदानमा सञ्चालन हुने प्रतियोगितामा सुन्दरहरैंचाका ६ टिम सहभागी छन् । प्रतियोगिताको उद्घाटन आज बिहान ८ बजे हुने आयोजकले हिजो साँझ पत्रकार सम्मेलन गरी जानकारी दिएको छ ।
स्थानीय स्तरमा क्रिकेट खेलको विकास तथा खेलाडीहरूलाई प्रोत्साहन गर्ने उद्देश्यले प्रतियोगिता आयोजना गरिएको आयोजकले जनाएको छ । प्रतियोगितामा नगरका विभिन्न स्थानलाई चिनाउने गरी टिमहरूको नामाकरण गरिएको छ ।
सहभागी टोलीहरूमा भुल्के वारियर्स (कप्तानः ज्ञातव्य सुवेदी), विराट वारियर्स (अनिस श्रेष्ठ), गछिया टाइगर्स (आयुष ढुङ्गेल), पाथिभरा टाइटन्स (अनिल आचार्य), रोयल हरैँचा (प्रमोद कार्की) र त्रिवेणी टाइगर्स (प्रदीप दास) रहेका छन् ।
क्लबका उपाध्यक्ष होमबहादुर पौडेलका अनुसार हरेक दिन बिहान ८ बजे पहिलो र दिउँसो १ बजे दोस्रो खेल हुनेछ ।
प्रतियोगितामार्फत् खेल प्रतिभा पहिचान, युवा खेलाडीहरूको क्षमता अभिवृद्धि तथा स्थानीय स्तरमा खेल संस्कृतिको विकासमा टेवा पुग्ने वडा नम्बर १२ का वडा अध्यक्ष तथा नगर प्रवक्ता रोशनप्रसाद ढकालले बताउनुभयो । प्रतियोगिताको संयोजन वडा नम्बर १२ ले गरेको छ ।
मुख्य सहयोगी संस्थाका रूपमा नगर खेलकुद विकास समिति, सुन्दरहरैँचा रहेको छ । प्रतियोगिता ड्युज बलका आधारमा खेलाइनेछ । प्रतियोगिताको विजेताले ट्रफीका साथमा २० हजार रुपैयाँ र उपविजेताले १० हजार रुपैयाँ पुरस्कार प्राप्त गर्नेछन् ।
विभिन्न विधागत पुरस्कारहरूको पनि व्यवस्था गरिएको आयोजकले जनाएको छ । नगरभित्रका खेलाडी उत्पादन गर्ने उद्देश्यले खुलाइएको अनलाइन आवेदनमा १ सय १७ जनाले दर्ता गराएका थिए भने छानोट प्रक्रियाबाट ९० जना खेलाडी छनोट भएका थिए । सबै टोलीमा उत्कृष्ट खेलाडीहरूको सहभागिता रहेकाले प्रतियोगिता अहिलेसम्मकै उत्कृष्ट हुने आयोजकको दाबी छ । आधाजसो खेलाडी १५ वर्षमुनिका रहेको आयोजकले जनाएको छ ।
आयोजकले प्रतियोगिता दोस्रो पटक आयोजना गरेको हो । पहिलो प्रतियोगिता सुन्दरहरैंचाका वडाबीच गराइएको थियो ।
