विराटनगरः ३८ औँ संस्करणको विराट गोल्डकप फुटबल प्रतियोगितामा चर्च ब्वाइज युनाइटेड सेमीफाइनलमा प्रवेश गरेको छ । विराटनगरस्थित शहीद रङ्गशालामा आइतबार राति भएको खेलमा पूर्वविजेता विभागीय टोली एपीएफ क्लबलाई १–० गोल अन्तरले पराजित गर्दै चर्च ब्वाइज अन्तिम चारमा पुगेको हो ।
खेलको २७ औँ मिनेटमा आशिष सोनामले मिलाइदिएको क्रस पासमा समीर तामाङले गरेको गोल नै निर्णायक बनेको थियो । गोलकर्ता समीर नै खेलको ‘प्लेयर अफ द म्याच’ घोषित हुँदै नगद ११ हजार रुपैयाँ हात पारे ।
एपीएफले २०७८ सालमा भारतीय टोली पन्जाब पुलिस क्लबलाई १–० ले पराजित गर्दै विराट गोल्डकपको उपाधि जितेको थियो ।
आजको खेल विभागीय टोली नेपाल पुलिस क्लब र मछिन्द्र फुटबल क्लबबीच हुने आयोजकले जनाएको छ ।
