विराटनगरः हिजो भएको निर्वाचनमार्फत् नेपाल उद्योग वाणिज्य महासंघ कोशी प्रदेशमा राजेन्द्र राउतको नेतृत्वमा नयाँ कार्यसमिति निर्वाचित भएको छ । दोस्रो कार्यकालका लागि राउत निर्वाचित हुँदा उनले प्रतिष्पर्धी नवीन रिजालको समूहलाई निकै पछि पारेका हुन् ।
राउतले १४२ मत प्राप्त गर्दा उनका प्रतिद्वन्द्वी नवीन रिजालले ५८ मत ल्याए । राउतले एशोसिएटतर्फ १०७ मत ल्याउँदा रिजालले ३९ मत, जिल्ला नगरतर्फ राउतले २४ र रिजालले १३ मत तथा वस्तुगत तर्फ राउतले ११ र रिजालले ६ मत ल्याएका थिए ।
निर्वाचनमा जिल्ला नगरतर्फको उपाध्यक्षमा झापाका ऋषिराज तिम्सिना, वस्तुगततर्फ विराटनगरका राजन श्रेष्ठ र एसोसिएट उपाध्यक्षमा विराटनगरकै रविन दाहाल निर्विरोध निर्वाचित भएका छन् ।
कोषाध्यक्षमा विराटनगरका श्रवणकुमार अग्रवाल निर्विरोध चयन हुँदा एसोसिएट सदस्यमा देवकीनन्दन अग्रवाल र भविषकुमार श्रेष्ठ पनि निर्विरोध चयन भएका छन् ।
पदाधिकारी तहमा निर्विरोध नेतृत्व चयन भए पनि अध्यक्ष र सदस्य पदमा मात्रै निर्वाचन भएको थियो । सदस्य पदमा पनि राउत प्यानलकै उम्मेदवारहरुको जीत भएको हो ।
परिणामअनुसार खुला सदस्यतर्फ जिल्ला नगरबाट कृष्णप्रसाद रिजाल, राजु ढुंगाना ‘राजीव’, जयप्रकाश शर्मा, हर्कबहादुर श्रेष्ठ र नवीनकुमार चौधरी निर्वाचित भएका छन् ।
वस्तुगत तर्फको सदस्यमा सुवास आचार्य र दीपक पाण्डे भएका थिए । उनीहरु सबै राउत प्यानलका हुन् ।
नेतृत्व चयनका लागि २०५ मतदाता सहभागी भएका थिए । जिल्ला नगर उद्योग वाणिज्य संघहरुबाट ३८, वस्तुगत संघसंस्थाबाट १९ र एसोसिएट सदस्यहरुबाट १४८ जनाले मतदान गरेका थिए ।
तीन वर्ष अघि निर्विरोध नेतृत्व हात लिएका राउतले अब तीन वर्षका लागि फेरि नेतृत्व लिएका छन् ।
