विराटचोकः नयाँ सरकार गठन भएपछि खुलेका दुई दिनमा शेयर बजार ११८ अङ्कले घटेको छ । आइतबार ७१ दशमलव ०५ अङ्क घटेको बजार हिजो सोमबार ४७ दशमलव ७१ अङ्कले घटेर २८३१ दशमलव ३९ बिन्दुमा अडिएको छ ।
हिजो ३४१ कम्पनीको ३ करोड १६ लाख ६ हजार ७१७ कित्ता शेयर १ लाख ५९ हजार ३२८ पटक किनबेच हुँदा १२ अर्ब ९६ करोड ६६ लाख ५९ हजार १६८ रुपैयाँको कारोबार भएको छ ।
सबै समूहमा गिरावट आएको नेप्सेमा सबैभन्दा धेरै व्यापार समूह २ दशमलव ५६ प्रतिशतले घटेको छ । सबैभन्दा कम उत्पादन तथा प्रशोधन समूह ० दशमलव २१ प्रतिशत घटेको छ ।
६ कम्पनीको शेयरमूल्य बढ्यो १० प्रतिशत
बजार घटे पनि ७ कम्पनीमा लगानी गरेका शेयरधनीले बनाए १० प्रतिशतका दरले सम्पत्ति जोडेका छन् । यसरी मूल्य बढ्नेमा रिलायन्स स्पिनिङ मिल्स, भुजुङ्ग हाइड्रो, रिज लाइन इजर्नी, होटल फरेस्ट इन, सुपर खुदी हाइड्रो, सूर्यकुण्ड हाइड्रो रहेका छन् । यी सबै कम्पनी हालै आईपीओ सूचीकृत भएका कम्पनी हुन् ।
घटेको बजारमा सर्वाधिक सम्पत्ति गुमाउनेमा सोलु हाइड्रोपावरमा लगानी गर्ने लगानीकर्ता रहेका छन् । सो कम्पनीको शेयरभाउ ७ दशमलव ७९ प्रतिशतले घटेको छ ।
रिडी पावर कम्पनीको सर्वाधिक ६८ करोड ४१ लाख रुपैयाँको शेयर कारोबार भएको छ । ङादी ग्रुप पावर, शिवम् सिमेन्ट्स, अपि पावर, नेशनल हाइड्रोपावर, एसवाई प्यानल, एनआरएन इन्फ्रास्ट्रक्चर, हिमालयन उर्जा विकास कम्पनी, कुमारी बैंक, आँखुखोला जलविद्युत कम्पनीको उच्च कारोबार भएको छ ।
बजार घटेसँगै समग्र बजार पूँजीकरण ४८ खर्ब १३ अर्ब ६७ करोड ८५ लाख ४६ हजार ९९८ रुपैयाँ कायम भएको छ ।
