सल्यानः सल्यानको कपुरकोट गाउँपालिका–३ का वडाध्यक्ष प्रदीप खड्काले तीन जना सेवाग्राहीका लागि मिटर नपाएपछि नेपाल विद्युत प्राधिकरण सल्यान कार्यालयमा मध्यरातसम्म धर्ना बसेर मिटर बक्स लिएका छन् ।
कार्यालयले सेवाग्राहीका लागि मिटर बक्स तत्काल उपलब्ध नगराएपछि वडाध्यक्ष खड्का आफ्नो झोलाको सिरानी लाएर सुतेर विरोध गरेपछि राति साढे १० बजे मिटर उपलब्ध गराइएको थियो । त्यसपछि उनले धर्ना तोडेका थिए ।
धर्नामा बसेका खड्काले साँझ साढे ६ बजे सल्यानका प्रतिनिधि सभा सदस्य रमेश मल्ललाई टेलिफोन गरी आफू धर्नामा रहेको जानकारी दिएका थिए । सांसद मल्लले जिल्ला प्रशासन कार्यालयमार्फत् विद्युत प्राधिकरणको सल्यानका प्रमुखलाई फोन गरी समस्या समाधान गर्न निर्देशन दिएपछि मिटर बक्स उपलब्ध गराइएको बताइएको छ ।
वडाध्यक्ष खड्काले सबै कानुनी प्रक्रिया पूरा गर्नुका साथै आवश्यक सबै कागजपत्र र दस्तुर बुझाउँदा पनि मिटर बक्स नपाएपछि सेवाग्राहीका तर्फबाट आफू धर्ना बसेको बताए ।
