विराटचोकः साताको पहिलो दिन आज शेयर बजार खुलेदेखि नै निरन्तर बढिरह्यो । क्रमिक रुपमा बजार बढ्दा कारोबार रकम पनि साढे २३ अर्ब रुपैयाँभन्दा बढीको भएको छ । नेप्से परिसूचक आज साढे ५४ अङ्क बढेको छ ।
नेपाल स्टक एक्सचेन्जको सूचकले आज १.८९ प्रतिशत बढेर २९३१.५५ बिन्दुमा विश्राम गर्दा साढे २३ अर्बभन्दा बढीको शेयर कारोबार भएको छ ।
आज ३६४ कम्पनीको ६ करोड १४ लाख ७ हजार ७४ कित्ता शेयर २ लाख ४ हजार ९५५ पटक किनबेच हुँदा २३ अर्ब ५९ करोड ७७ लाख १२ हजार १८२ रुपैयाँको शेयर किनबेच भएको हो । व्यापार समूहको सूचकमा ०.११ प्रतिशतले घटेबाहेक बाँकी सबै समूहको सूचकमा हरियाली छाएको छ ।
आज माइक्रोफाइनान्स समूहमा सबैभन्दा धेरै ४.२१ प्रतिशतको वृद्धि देखिएको छ । होटल तथा पर्यटन समूह ३.०५ प्रतिशतले बढ्दा निर्जीवन बीमा समूह २.७२ प्रतिशतले बढेको छ ।
बैंकिङ समूह २.४९ प्रतिशत, विकास बैंक समूहमा २.४६ प्रतिशत र बित्त समूहमा २.१३ प्रतिशतले बढेको छ । जीवन बीमा समूह २ प्रतिशत, उत्पादन तथा प्रशोधन समूह १.९३ प्रतिशत, अन्य समूह १.७१ प्रतिशत, सामुहिक लगानी कोष समूह १.२४ प्रतिशत, जलविद्युत समूह ०.३३ प्रतिशत र लगानी समूह ०.७७ प्रतिशतले बढेका छन् ।
कुमारी बैंकको धेरै कारोबार
आज कुमारी बैंकको मात्रै ८५ करोड ९६ लाख १५ हजार ६८३ रुपैयाँको शेयर किनबेच भएको छ । नेशनल हाइड्रोपावर, शिवम् सिमेन्ट, ङादी ग्रुप पावर, हिमाल दोलखा हाइड्रोपावर, आँखुखोला जलविद्युत कम्पनी, रिडी हाइड्रोपावर, बलेफी हाइड्रोपावर तथा सानिमा मिडल तमोर हाइड्रो उच्च कारोबार गर्ने अन्य कम्पनीमा परेका छन् ।
७ कम्पनीको मूल्य बढ्यो १० प्रतिशत
बजार बढेसँगै आज ७ वटा कम्पनीको शेयरमूल्य १० प्रतिशत बढेको छ । जसमा अधिकांश भर्खरै प्राथमिक शेयर सूचीकृत भएका कम्पनी परेका छन् । कर्पोरेट डेभलपमेन्ट बैंक, सालपा विकास बैंक, रिलायन्स स्पिनिङ मिल्स, अभियान लघुवित्त, सोलु हाइड्रोपावर, भुजुङ हाइड्रोपावर र होटल फरेस्ट इन रहेका छन् । सबैभन्दा बढी एनआईसी एशिया ब्यालेन्स्ड फण्डका लगानीकर्ताहरुले ५ दशमलव ७१ प्रतिशतका दरले सम्पत्ति गुमाएका छन् ।
बजार बढेसँगै समग्र बजार पूँजीकरण ४९ खर्ब ६८ अर्ब ५९ करोड ७ लाख ७३ हजार ३६२ रुपैयाँ कायम भएको छ ।
