विराटचोकः बुधबार विराटनगरमा भएको भेलाले लोकतान्त्रिक गैरसरकारी संस्था महासंघ नेपाल कोशी प्रदेश समिति गठन गरिएको छ ।
भेलाले कमला कँडेलको अध्यक्षतामा कोशी प्रदेश समिति गठन गरेको हो । समितिको उपाध्यक्षमा झापाका ओमप्रकाश गौतम, महिला उपाध्यक्षमा सुनसरीकी कोशिला चौधरी, महासचिवमा मोरङकी पार्वती गच्छदार र कोषाध्यक्षमा इलामका रमेशचन्द्र सुवेदी चयन हुनुभएको छ ।
सदस्यहरूमा जिल्ला समितिका अध्यक्ष पदेन सदस्य रहने व्यवस्था रहेको छ । सोहीअनुसार मोरङ अध्यक्षमा दिलीपकुमार काफ्ले सदस्य हुनुहुन्छ ।
भेलाले सदस्यता नवीकरणका लागि सदस्य संस्थाहरूलाई आह्वान गर्ने, जिल्ला समितिहरू गठन तथा पुनर्गठन गर्ने र पालिकास्तरीय समिति गठन गर्ने निर्णयसमेत गरेको छ ।
भेलामा लोकतान्त्रिक गैरसरकारी संस्था महासंघ नेपालका केन्द्रीय सचिव तथा कोशी प्रदेश इन्चार्ज मदनराज कटुवाल र केन्द्रीय सदस्य केशरकुमार बस्नेतको सहभागिता रहेको थियो ।
