इनरुवाः सुनसरीको गढी गाउँपालिका–२ औरावनी चोकमा सञ्चालित एक फार्मेसीबाट लागूऔषधसहित मेडिकल सञ्चालक पक्राउ परेकी छिन् ।
मोरङको सुन्दरहरैचा नगरपालिका–८ घर भई हाल गढी–२ मा बस्ने ३२ वर्षीया मोनिका चौधरीलाई प्रहरीले नियन्त्रणमा लिएको हो । चौधरीले औरावनी चोकमा शिवमहिमा मेडिकल हल सञ्चालन गर्दै आएकी थिइन् ।
सो फार्मेसीबाट प्रतिबन्धित लागूऔषध बिक्री वितरण भइरहेको भन्ने विशेष सूचनाका आधारमा कोशी प्रदेश प्रहरी कार्यालय विराटनगरको प्रादेशिक अनुसन्धान समूह र इलाका प्रहरी कार्यालय दुहबीबाट खटिएको संयुक्त टोलीले खानतलासी गरेको थियो । खानतलासीका क्रममा फार्मेसीमा लुकाइछिपाई राखेको अवस्थामा २ हजार ९३० ट्याब्लेट ‘ट्रामाडोल’ र ‘स्पास्पेन’ बरामद गरिएको प्रहरीले जनाएको छ ।
चौधरीमाथि थप अनुसन्धान भइरहेको प्रहरीले जनाएको छ ।
