काठमाडौंः प्रतिनिधिसभाको निर्वाचन आउन अब १७ दिन बाँकी छ । निर्वाचन आयोगले आगामी प्रतिनिधिसभा सदस्य निर्वाचनका लागि आजदेखि १५ दिनसम्म मात्र औपचारिक प्रचारप्रसार गर्न पाउने व्यवस्था गरेको छ ।
आयोगका अनुसार फागुन १८ गते राति १२ बजेसम्म चुनावको प्रचार गर्न पाइनेछ । त्यसपछि ‘मौन अवधि’ शुरु हुनेछ । मौन अवधिमा प्रचारप्रसार, मत माग्ने गतिविधि वा मतदातालाई प्रभावित पार्ने कार्य पूर्ण रूपमा निषेध हुनेछ ।
आयोगका अनुसार उम्मेद्वारलाई ६४ बुँदे निर्देशन जारी गरिएको छ । निर्देशनअनुसार उम्मेद्वारहरूले फागुन ४ देखि १८ गतेसम्म मात्र जुलुस, आमसभा, कोणसभा र घरदैलो कार्यक्रम गर्न पाउनेछन् । प्रचार कार्यक्रम बिहान ७ बजेदेखि साँझ ७ बजेसम्म मात्र सञ्चालन गर्न पाइनेछ ।
आयोगले निर्वाचन खर्च पारदर्शी बनाउन कडा व्यवस्था लागू गरेको छ । उम्मेदवार र दलले गर्ने सम्पूर्ण खर्च बैंक वा वित्तीय संस्था मार्फत् गर्नुपर्नेछ । निर्वाचन परिणाम घोषणा भएको ३५ दिनभित्र खर्चको विस्तृत विवरण आयोगमा बुझाउनुपर्नेछ । तोकिएको समयभित्र विवरण नबुझाए वा गलत विवरण पेस गरे कानुनी कारबाही गरिने चेतावनी आयोगले दिएको छ ।
त्यस्तै, निर्वाचन चिह्न अंकित टिसर्ट, टोपी, झोला, मास्क, लकेटजस्ता सामग्री वितरण र प्रयोगमा प्रतिबन्ध लगाइएको छ । मतदातालाई कुनै प्रकारको आर्थिक प्रलोभन वा उपहार वितरण गरेमा गम्भीर उल्लंघन मानिनेछ ।
आयोगले आचारसंहिता उल्लंघन भएमा सचेत गराउनेदेखि दण्ड जरिवाना र उम्मेदवारी खारेजीसम्मको कारबाही हुन सक्ने जनाएको छ । गम्भीर उल्लंघनमा ६ वर्षसम्म कुनै पनि राजनीतिक प्रतिस्पर्धामा भाग लिन नपाउने व्यवस्था गरिएको छ ।
