मृगौलियाः विविध कार्यक्रमका साथ सुन्दरहरैँचा नगरपालिका–२ मृगौलियास्थित लभ्ली एन्जल्स इङ्लिस बोर्डिङ स्कुलको २९ औँ वार्षिकोत्सव तथा पुरस्कार वितरण समारोह शनिबार सम्पन्न भएको छ ।
प्रमुख अतिथिको आसनबाट कार्यक्रमलाई सम्बोधन गर्नुहुँदै सुन्दरहरैंचा नगरपालिकाका नगरप्रमुख केदारप्रसाद गुरागाईंले विद्यालयले गुणस्तरीय शिक्षा प्रदान गर्दै नगरको शैक्षिक विकासमा पुर्याएको योगदानको प्रशंसा गर्नुभयो ।
कार्यक्रममा विभिन्न विधामा उत्कृष्ट विद्यार्थीहरूलाई पुरस्कार वितरण गरिएको थियो भने अभिभावक चिठ्ठा कार्यक्रममार्फत् अभिभावकलाई उपहार प्रदान गरिएको थियो । विद्यार्थीहरूले नृत्य, गायन, तेक्वान्दो, नाटक तथा खेलकौशल प्रस्तुत गर्दै सांस्कृतिक कार्यक्रममार्फत दर्शकलाई मनोरञ्जन दिएका थिए ।
कार्यक्रममा विद्यार्थीहरूले तयार पारेका विज्ञान, सामाजिक तथा वातावरणसम्बन्धी चित्रहरूको प्रदर्शनीसमेत गरिएको थियो । कार्यक्रममा विद्यार्थीहरूले नाटक पनि प्रस्तुत गरेका थिए । सो नाटकलाई उपस्थित दर्शकले औधी मन पराएका थिए ।
कार्यक्रममा शिक्षक दीक्षा ढुङ्गाना र कर्मचारी शम्भुप्रसाद घिमिरेलाई सम्मान गरिएको थियो भने पूर्व विद्यार्थी शुभम् साह र सञ्चारकर्मी मणिराम दाहाललाई पनि सम्मान गरिएको थियो ।
निजी तथा आवासीय विद्यालय अर्गनाइजेसन (प्याब्सन) मोरङका पूर्व अध्यक्ष अर्जुन बस्नेत, विद्यार्थीहरू लप्सन बिके र आकृति साह तथा सम्मानित पूर्व विद्यार्थी शुभम् साहले आफ्नो धारणा राख्नुभएको थियो ।
गायक श्रीकृष्ण लुइँटेल (बोकेदारी) को पनि साङ्गीतिक प्रस्तुति रहेको कार्यक्रममा विद्यार्थी, शिक्षक तथा विद्यार्थीले विभिन्न गीतमा नृत्य गरेका थिए ।
विद्यालयमा गत शैक्षिक सत्रमा विद्यालयमा शतप्रतिशत दिन हाजिर हुने २४ जना विद्यार्थीलाई सम्मान गर्नुका साथै मस्ट रेगुलर टिचर अवार्डको सम्मान अमित सेन खवास र यशोदादेवी पौडेललाई प्रदान गरेको थियो ।
त्यस्तै, विद्यार्थीलाई इनोभेसन अवार्ड, एक्सिलेन्स इन आर्ट अवार्ड, इमर्जिङ स्टुडेन्ट अवार्ड, बेस्ट ह्याण्डराइटिङ अवार्ड, बेस्ट क्लासरुम पार्टिसिपेन्ट अवार्डलगायतका अवार्ड पनि प्रदान गरिएको थियो ।
विद्यालय सञ्चालक समिति अध्यक्ष उर्मिला थापा बस्नेतको सभापतित्वमा विद्यालय परिसरमा आयोजित कार्यक्रममा विद्यार्थी, अभिभावक, शिक्षक तथा स्थानीय व्यक्तित्वहरूको उल्लेख्य उपस्थिति रहेको थियो ।
